【賭馬講呢啲】原先座騎表現欠佳 雷神感冒孭少隻鑊！（妙瞳）
蘋果日報 2019/12/30 22:40
莫雷拉妙瞳賭馬講呢啲
莫雷拉剛戰原定座騎表現一般
來港後守齋多時的希威森，最終憑「興爾」於2019年壓軸戰尾場叩開勝關，馬友笑言這就叫衰家食尾糊！
講句公道說話，希威森雖然未見煞食騎功，但陣上犯大錯並不多，希望這頭馬缺口打開後轉弱為強。
另邊廂，本是剛戰（29日）賽事焦點的雷神，最終因為感冒未能上陣，令一班追雷神散戶及基金均無辦法追數，無疑騎者因此錯失了夥拍「日日精彩」捧盃機會。
賽後有評論指他失運，但除此駒外，全日原有多匹實力馬配雷神，結果最叻兩個第三。按上述馬匹所交走勢，就算雷神精神爽利親自操刀，恐防同樣贏唔到孭鑊居多，所以他與一班Fans，可能才是2019年最有「尾運」！
踏入2019年尾，要數最旺練馬單位，除了在榜首帶離了七場的姚本輝外，必然是連續四次有馬贏兼剛戰又起孖的韋達，若非「紅粉彩影」輸影相，隨時取得從練後首次帽子戲法。
持續近期強勢，元旦日（2020年1月1日）韋達又有惡馬力爭五連勝，此乃列陣第三場三班1200米的「聚財」，剛戰選擇在強林立的國際賽日初出角逐今戰田草1200米還要有飛，可見幕後自視甚高。
結果「聚財」全程被迫外遊，直路仍能沿當日不算好追的中外叠後上僅敗，明顯屬超班貨色，今勻「聚財」對手減弱，有力補中。
另外，廐侶第六場二班1000米「玩得好」上仗轉倉初出跑1200米終點前才撻著餘勢吸睛，今次增程跑1400米對症下藥，亦為韋達數糊籌碼。