元祖男團水晶男孩前年重組後大受歡迎，今年初更舉行出道20周年演唱會，不過當中38歲成員姜成勳今日卻被爆涉詐騙遭友人K某起訴。

據報道引述K某嘅起訴書透露，姜成勳於2010年11月對K某表示，因為日本公演未能如期舉辦，需要一筆錢填補空缺，多次向K某借款，累計金額達到1億4220萬韓圜(約102萬港元)。K某透過銀行匯款畀姜成勳及當時與姜成勳同居嘅友人N某，但隨後姜成勳告知冇收到匯款，不久後更與K某斷絕聯繫。K某指姜成勳仍然冇還債嘅意欲，所以於上月遞交起訴書。

但據悉姜成勳已非首次涉詐騙，佢於2013年就曾捲入金錢糾紛，當時有指佢欠下10億韓圜(約724萬港元)借款遭判處緩刑，2015年又被大耳窿提告詐騙，最後被判無罪，有唔少粉絲留言力撐偶像，認為係有心人士見到佢再度翻紅先刻意抹黑。

而姜成勳所屬嘅YG事務所表示，因為事件發生於8年前、與水晶男孩簽約前，所以對事件毫不知情，正了解事件中。同時，姜成勳將於下周六首次喺台灣舉辦個人見面會，未知見面會會否受事件影響。

隨後姜成勳嘅前經理人就替姜成勳感到無辜，表示：「呢單案跟2015年佢獲判無罪嘅事件係相同情況，依家對方只係交咗起訴狀，根本未確定佢有嫌疑，就已經咁報道，真係覺得好遺憾。」前經理人續指，N某拎住錢走咗佬，姜成勳完成不知情，亦唔認識K某。

更多韓流，喺晒《娛果》
http://fb.com/appledailyent