34歲嘅苟芸慧（苟姑娘）同44歲男友、錫礦大王後人陸漢洋訂情咗一段時間，噚日有周刊話佢哋拍拖去半山睇豪宅，仲話陸漢洋計劃喺呢個意大利之旅，向女友求婚兼影婚紗相，婚禮預計喺明年初舉行，所有嘢交俾苟姑娘決定！
(新聞連結： http://bit.ly/2xk8315 )

苟姑娘今日喺米蘭出席時裝騷，講到佢係咪同男友喺呢個旅程訂婚，佢笑笑口話：「我今次係為工作，成個行程都full晒，得一日時間可以過二人世界！」唔知男友又有冇計劃俾個驚喜佢呢？佢就話：「你要問返佢喎，我唔知道，不過大家問得多，搞到我覺得已經冇驚喜！」

不過問到佢哋係咪諗住喺外國結婚，苟姑娘就話：「始終我啲屋企人都喺加拿大，所以都會希望加拿大結婚，之後再返香港同朋友搞party！」至於有冇同男友拍拖睇樓，佢大方話：「有呀，不過只係我想買樓，等屋企人返嚟香港時可以一齊住，我哋o依家各有各住，遲啲先諗呢個問題，唔使咁心急！」