大台播緊《果欄中的江湖大嫂》，令我諗起第一次去果欄嘅情景。或者你一睇篇文條題，就會問我去果欄唔買生果去搞乜？我嗰次去果欄真係冇買生果呀，係跟住啲攝影朋友去影相（我冇影但八卦去齋望）。點解要跟大隊去果欄？因為細細個就聽過果欄龍蛇混集，不過人愈大咗就知道呢個只係訛傳，人世間兇險嘅地方又點會係果欄呢？求其一個office隨時混亂恐怖過佢啦。

講返嗰晚先，喺廟街食完飯，八點鐘就行過去果欄。八點鐘嘅果欄一個人都冇，間間舖頭都落晒閘、黑麻麻。問攝影朋友，原來咁早嚟到係睇環境，因為想影果欄工友開工嘅情況，但又唔想阻人開工，所以早啲嚟睇吓邊個位置最好，想唔阻碇又可以影到好嘢。九點鐘左右，原本漆黑一片嘅果欄，零星咁陸續開燈，唔同欄嘅人都返嚟開閘開門，唔使好耐就見到工友一車車咁送啲生果嚟。原本果欄只係得外面馬路嘅車聲，立即多咗人聲同埋搬運聲。我哋幾個人左閃右避，怕阻住人做嘢。雖然有基本禮貌問咗人先影相，但最後都自覺太過阻碇，所以愈褪愈出，最後喺外圍影，影完就走。

成篇嘢，其實講嘅只係一件事：去八卦可以，但千祈咪阻人做嘢﹗我知《果欄》套劇一出街，一定有啲人會想去果欄度睇吓行吓。如果想睇果欄朋友嘅工作情況，記住要知碇。其實中午左右時間去就最好，因為果欄仝人收完貨再出完貨，就有時間同散客吹下水、散賣下生果，想了解果欄嘅運作同埋買又靚又抵嘅生果，呢段先係黃金時間。

專欄作者簡介：
方以文
電視迷，未成精。睇好電視。

Facebook link：
https://www.facebook.com/fongeman/