【最緊要識返轉頭】雷有輝與太太4度離合 自認渣中之渣:下半生要還畀佢
太極 主音 雷有輝
Your browser does not support the video tag.
童話故事吸引人的地方,就是王子與公主歷盡千辛萬苦,終於可以在皇宮相親相愛地生活下去,但現實歸現實,兩個相愛的人,可否白頭到老,似乎並非理所當然的事,原因不外乎因為疾病、因為第三者的介入,最終令感情有變,從此各走各路。當然亦有人歷盡人生的高高低低,最後才發現,最好的原來一直在身邊,雷有輝便是最好的例子。
太極樂隊主音雷有輝(Patrick)原定在今年4月舉行個人音樂會,結果因為疫情影響,被迫順延至8月中舉行。面對近日疫情在社區大爆發,到時能否順利開騷,暫時仍然有待觀察,但Pat哥依然為演唱會做準備,日前他應《蘋果》的邀請,回到他小時候居住的地方─紅磡。當日訪問在紅磡一間舊式冰室進行,這間冰室經歷了三代人,冰室附近又有一間地產舖,他們一見面,猶如老朋友一樣寒暄問候近況。印象中的Pat哥給人一種招積的感覺,他笑說:「係,我係一個咁嘅人,可能係細仔縱慣咗,好勝心好強,成日恰Albert(雷有曜),我試過玩模型車,點知架車出咗軌,我咪發脾氣將架車掟咗落街,真係好霸道,諗返起都覺得好麻煩,好失禮。」不過亦因為Albert的關係,令爸爸媽媽支持他的夾band生涯,他說:「其實我都覺得好彩,我屋企有四兄弟,對上係Albert,仲有大哥同二哥,佢哋大過我超過10年,而且本身都鍾意玩音樂、夾band,所以爸爸媽媽都見慣,而且我又有Albert睇住,佢不嬲係乖仔又純品,所以我只要先搞好啲功課,再跟住Albert就冇問題。不過爸爸開通啲,私下鍾意我哋搞band,有時仲同啲同事曬吓命,放心俾我哋去玩;媽咪就會語重心長啲,成日叫Albert睇住我。」
上天對Pat哥認真不薄,一方面他得到家人的支持,可以做自己想做的事,另一方面又有一個對他極度包容的太太,兩人從1983年開始拍拖,到1990年分手,當中經歷4次離離合合,直到2000年修成正果,大團圓結局。談到分手原因,Pat哥二話不說直認因為自己的定力不夠,受不住引誘,結果一次又一次出軌,他說:「嗰陣又叫做比較多人識,有番多少少知名度,個人比較輕飄飄,覺得自己好威,所以好容易會識到人,又會好容易墮入情網,愛情陷阱。其實佢都俾身邊啲朋友鬧到佢七彩,由第一次分開,到第二次復合已經開始鬧,『唔係嘛,你又同返佢一齊?呢個人都信唔過。』仲要係唔止一次,所以其實唔止我老婆,連佢嘅屋企人都包容我,可能真係相信佢冇揀錯。」
究竟由幾時開始,Pat哥終於可以「定性」下來,重新檢視自己的人生?一切從1995年開始。當年太極推出專輯《Utopia》之後宣佈暫休,七子各自尋找自己目標,當時對Pat哥來說,絕對是人生的低潮期,他一度放棄自己建立了多年的音樂事業,隻身走到東京,重新思考人生:「嗰陣幾乎係冇事業,基本上冇咗太極,我個人都頹頹哋,連和音都唔做,靠住一份積蓄,一個人走咗去東京生活一年,可能真係叫做離開一個傷心地。嗰陣可以算係人生最低潮嘅時期,我有一個日本朋友係做音樂,有地方畀我住,叫做有啲嘢可以做吓,變咗識得反省自己,反醒過自己之前做過嘅嘢,既然都已經做過咁多衰嘢,所以都係時候去改變吓自己,無論係事業抑或係感情,應該朝住個乜嘢方向,好好去出發。喺嗰一年見到好多嘢,同香港人完全好唔同,嗰度太多叻人,我學到好多嘢,喺嗰邊搵食真係唔容易,所以最後決定返嚟呢個熟悉嘅地方。」
從日本返港後,Pat哥專注做和音的工作,想不到事業上可以從新開始,連帶感情亦有所得着:「其實我哋最後一次分手之後,已經冇聯絡,佢連電話都改埋,點知有一次喺街撞見一個朋友,機緣巧合講起我老婆,朋友話之前都撞到佢,大家都交換咗電話,之後仲將老婆嘅電話號碼畀咗我,叫我得閒同佢聯絡,就係咁咪有返電話,有一下扚起心肝,當係搵返個朋友傾吓偈,慢慢就喺返埋一齊。」之不過Pat哥出軌的次數太多,紀錄絕對欠佳,任何承諾很難令人相信,Pat哥數數手指說:「一次生,兩次熟,三次大結局,所以我哋咪結婚,其實人係會成長,經歷咗咁多次離離合合,我個人都會知道自己真係玩夠,男仔始終係比女仔遲熟,喺嗰個moment,我得20幾歲,可能都係得10幾歲智商,我同老婆差唔多年紀,佢一定早熟過我好多,思想又成熟過我好多,所以佢一定係畀機會我,畀時間我去闖、去碰釘,可能因為咁,佢睇得出我真係大個咗,同以前有唔同嘅表現,覺得我係踏實咗。不過佢都有話唔知自己點解會原諒我,佢都有俾機會自己出去識吓男仔,不過總係覺得爭啲嘢,去唔到嗰啲階段,可能係上天安排好,畀我一個咁好嘅家庭,所以我下半生係要還返畀佢,而家啲嘢係會以佢為主,就算工作都係會就佢先,要好好報答呢個家庭。」
Pat哥亦有感而發地說:「我自己都話自己(係)渣男之中嘅渣,渣滓入面嘅塵埃,所有嘢要經過成長,先可以學識乜嘢係啱定錯,要經歷咗某啲嘢,至可以去到另一個學習階段,大家都要畀啲機會渣男,要learn from mistake,要承認自己錯過,要喺錯誤裏面去學習,下次咪會學識做返啱;最緊要識得改正,無論係大小事都好,就算係犯咗罪,坐完監都好,學識咗之後,都可以有好好嘅前途,畀機會一啲改過自身嘅人,我覺得真係好緊要,做錯唔緊要,最緊要承認,承認完之後,即刻要做返好。」
近日因為一場世紀疫情,令到不少人的人生有新衝擊,情況比2003年的沙士更為嚴峻,他說:「今次真係史無前例,唔好當然係手停口停,好彩我喺20年前做咗保單,變咗而家可以重新計劃,喺呢段時間把握時間同家人相處,以前做嘢成日要走埠,一個禮拜有幾日唔喺屋企,就算喺屋企,都未必撞啱時間齊齊坐低食飯,未必可以有好深入嘅傾偈,所以可以爭取時間同屋企人相處,尤其係同阿仔,佢而家19歲,突然間覺得喺呢一年成長得特別快,以前話題圍繞玩、打機,但係而家可以講股票、投資,仲試過開咗支紅酒,摸住酒杯傾吓偈,真係好過癮。」
-----------------------------
打國際線 《蘋果》英文版免費試睇
按此了解更多 英文版已登錄新版《蘋果》App
按此下載/更新