當年今日
關於我們

囚牢中痛失見親人最後一面 寫信師籲港人勿放棄獄中抗爭者

蘋果日報 2021/04/21 10:34

寫信師筆友

空間中瀰漫不明異味,兩隻頗巨型、滿身爛肉的老鼠在頭頂渠道爬行,有曱甴跌落別人背上嚇得對方尖叫,這是美孚北區議員李俊晞助理Eunis,對荔枝角收押所探訪者等候室的鮮明記憶。本來從事美容行業,傘運那年有過一點政治啟蒙,直到去年抗爭突然間身邊眾多朋友被捕還柙,今年1月她決定轉行,即使人工少一半亦要做議助,希望盡力支援、關懷獄中抗爭者。
empty
Eunis正處理一袋袋提供予在囚抗爭者家屬領取物資。本報記者攝
empty
零食網店「Jimmy Jungle」年初以成本價眾籌款項採購探監物資,提供予在囚抗爭者家屬領取,而「隨心物流」一直為其免費運送物資,至今已送了40個星期。網頁截圖

「啲信可以話係精神食糧」

議辦位置距荔枝角收押所只需十多分鐘路程,有借出地方予家屬領取探監物資袋,袋中有可交予還柙或在囚人士的零食、日用品,由零食網店早前以成本價眾籌後預備,有黃店一直免費幫忙運送到不同議辦,已送了40個星期。Eunis指,議辦今年7月亦開始舉辦筆友計劃,「當手足家屬搵我攞物資,我就會跟進佢哋有冇其他準備,例如私飯、法律方面,要唔要筆友,或者有冇書想睇。」
計劃至今約配對了42對,她本身亦是「寫信師」,透過寫信、探訪,現有十多個獄中筆友。無論工作如何繁忙,她亦堅持寫信,亦經常利用假日去探監,等待回信時心情同樣急切,「真係有望天打卦感覺,因為疫情下郵局有時冇派信,佢哋有係咁同我講話想要筆友,啲信可以話係精神食糧。」
她認為,獄中筆友主要想收到描寫日常生活的來信,最理想是雙方均以朋友身份對等地表達心情,「平時有『解悶工廠』寄新聞、連登post入去,同埋佢哋有訂報紙,多數都係《蘋果》,都會知道好多時事,佢哋係比較想要啲實質有內容互動嘅信。」
有時對方會請求「入書」,例如日本漫畫《進擊的巨人》,「呢個喺入面比較多年輕人睇嘅,我自己都有睇,佢哋比喻係同香港而家嘅狀況都幾似,我哋就係俾人屠宰緊嘅市民,嗰啲巨人就係政府高官。」但部份書籍難以「通關」,「有時佢哋想睇其他國家嘅民主運動,但未必一定本本都入到,例如《百年追求:臺灣民主運動的故事》,就未試過入到。」
empty
Eunis指,《進擊的巨人》漫畫很受獄中年輕人歡迎,當中描寫有食人巨人襲擊平民,「佢哋覺得係好似香港目前嘅政治環境。」

「見(親人)最後一面都冇辦法做到」

這年來她觀察到,很多牆內抗爭者年紀較自己小,「有啲小朋友真係十零歲就入咗去,無可能唔心酸,我呢個歲數仲係睇緊卡通片,但佢哋就可能要面對牢獄。」有人還柙逾年,有人最終被定罪判囚,她嘆一口氣,「好無力嘅地方係,望住刑期越判越過份,或者喺入邊受到不公平不人道對待,環境又差,瞓又瞓唔到,食又食唔到,人喺出面隔住面牆真係乜都冇得幫。」
與去年相比,今年到收押所探訪時排隊輪候時間大增,平日亦試過等候兩個多小時,意味還柙人數越來越多,「而等候室環境已經好差,我問過入面係更惡劣,佢哋有話一入去係要先住『豬肉房』一晚,真係20、30隻曱甴一齊瞓,講緊係5、6個品種嘅曱甴。」
最心酸是,有人在囚期間家人患重病,相親卻不能相見,「覺得個政權將佢哋推到去呢個地步,令佢哋失去咗中間應該要有嘅,可能係學業、同身邊人嘅時間,真係見最後一面都冇辦法做到;可能下一次食飯,就係10年後。」

「希望大家唔好放棄佢哋」

牆內亦知悉香港再掀移民潮,的確有人倍感傷心、灰心,「但係佢哋都希望會做到support(支持)多過表達唔開心,會抽時間去寫好多家書去鼓勵出面嘅人唔好放棄。」
她坦言書信和探訪,即使未必支撐到對方很多,但至少可令牢獄中添一點希望,「希望大家唔好放棄佢哋,為香港付出咁多而當要付上代價,冇人喺佢哋身邊,我可以做嘅就係呼籲香港人,唔好因為私事太繁忙而忘記仲喺入面嘅手足,佢哋好需要其他人支持鼓勵。佢哋係無罪,唔應該有咁嘅結果。」
正如她手上一封獄中來信節錄:「我們都渴求勝利,雖仍未看到任何曙光,如疾走在隧道中尋找那丁點兒的亮光,沒有勝利,沒有放棄。」
empty
Eunis寫信時不時分享自己的心事,有時獄中筆友會反過來安慰自已,亦有較年長筆友會分享人生經驗。本報記者攝
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新:iOS / Android
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁