【楚雲聲】第五場四歲馬打骰！博「好友利」一拖三（Cloudy）
蘋果日報 2019/12/20 20:20
一拖三第五場四歲馬Cloudy楚雲聲好友利
好有利現年四歲
「喂？阿妹，放假過嚟？幾個P（派對）等緊你。」成班老表啲塞豆窿玩起上嚟唔係人咁品。
我曾經以為係去食吓嘢抽吓獎好輕鬆，有乜慘得過玩個遊戲唔贏得而又不能夠太着跡？
係玩每一個遊戲都要咁......唔想佢哋輸咗大喊，再令人誤會係我蝦細路，真係要硬食。
揀番埋咁高咁大嘅同齡馬，公平競技勝者為王，如果順利埋QT，不但抹走我嘅慘痛經歷，做冬聖誕都送我絕佳心情。
明日（21日）第五場四班1200米「行星夢」贏完繼續做工夫，進步有抽內檔，抵銷啲負磅加幅，照上次咁跑啱晒。
「大軍閥」久休無怠慢，狂轉配備試閘，用贏閘的半掩防沙眼罩上陣，跑番水準當然勁。
「精進百樂」跑番1200米更好，食得操得又有檔，無懼上次嘔血的經歷。
「好友利」有鬥心有後勁，比上面三隻贏完重磅馬多經驗。
上次塞住跑發揮唔順，今次多拍跳而有勁度，孭輕佢哋10磅有多，出閘醒少少再走靚位，有權爭勝。
如果嫌重皮就拎呢隻做膽。四隻四歲馬，前後最多爭兩三個月，盡情跑啦！贏咗就讚你叻叻豬。