香港行家問甚麼是「關說」。當然是看到近期台灣最大政治風暴的兩個關鍵字。新聞大到報紙連續幾日四、五版。
台灣教育部辭典解釋有二。
一，由人代為請託游說。《史記》：「上廢栗太子，竇太后心欲以孝王為後嗣，大臣及袁盎等有所關說於景帝。」
二，勸諫。《新唐書》：「區區之臣，冒顏而關說，難哉！」
香港解釋應該係咁：「喂，阿乜哥，大家咁friend，嗰單嘢碎料嚟啫！大家四四六六拆掂佢啦！係囉！大家自己友！下次出嚟飲茶，我嘅。」
話說，有一日，國民黨籍的立法院院長王金平，打電話給民進黨元老級召集人柯建銘。內容如果簡單的用粵語說：「老柯，你俾人告嗰單嘢（一、二審冇罪，檢察官可以上訴）我打咗畀法務部長阿勇伯。搞掂咗！大家friend底，自己友，檢察官唔會上訴，放心。」
問題來了，上述電話全部被阿勇伯自己手下的檢察官偷錄晒，並立即向總統馬英九報告。
身兼國民黨主席的九哥立即開記者會，指是民主最恥辱的一日，又說此類關說妨礙司法公正，要開除王金平國民黨籍。沒有了黨籍，等於沒有了立法院議席，當然亦沒有了院長寶座。
故事就咁簡單。是非亦不難分辨吧！？
在台灣，其實好難。關鍵亦在關說兩個字。
在台灣，關說人人都在做，日日有發生。同偷情叫雞差唔多咁多啩！
曾有某報大老闆說：「乜話，做報紙唔接受關說？有乜可能呀！」
係嘞！既然大家習以為常的行為，九哥使唔使出手咁快狠準（唉！國家大事唔見佢咁叻），要人一夜之間，由立法院院長變成庶民！
使唔使去到咁盡呀！係嘞，這正是現在台灣人一般的睇法。九哥民望亦因此跌到谷底，滿意度只剩百分之十一。振英哥勁好多啦！
其他為人民詬病的，仍有以下幾點！
一，立法院院長的電話都夠膽竊聽偷錄，仲有乜人電話不敢偷錄！人人自危。白色恐怖！
二，負責竊聽的檢察官收到好料，即越級向九哥報告，跳過法務部長阿勇伯及行政院長。冇官場倫理。
三，趁院長王金平在馬來西亞嫁女回不來，擒擒青開記者會公佈錄音帶內容，炒埋法務部長阿勇伯。王金平連解釋機會都冇。不近人情。
四，九哥與王金平本有心病，路人皆知。公報私仇。
五，相關單位未深入調查，九哥未審先判。見獵心喜。
六，七，八。太多，講唔晒！

後記：趕狗入窮巷。如果趕的是一群大漢，又刀又槍又捕獸器的，而被趕的是一隻為朋友而偷了主人一嚿骨頭的可愛小西施狗。狗可能不敢反撲，但旁觀者會路見不平，拔劍相助。「乜料呀？偷塊骨頭畀朋友食啫，使唔使百九幾友，追殺佢打死佢呀！」

葉一堅
逢周一刊出
mailto:[email protected]

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange