雙學三子成為政治犯後，唔少人都關心佢哋獄中情況，社福界議員邵家臻噚日就去咗壁屋監獄，成為第一個探望之鋒嘅立法會議員。
阿臻同八方講，因為佢係以立法會議員身份進行公務探訪，可以同之鋒喺一間約50、60呎嘅房間內，只隔住張枱坐低傾足一粒鐘，令兩人更暢所欲言，之鋒仲講咗好多自己同囚友喺監獄生活情況，有啲真係估佢唔到，例如好多囚友問佢，游蕙禎真人究竟靚唔靚？
阿臻仲同八方講，之鋒喺獄中精神良好，講嘢時「機關槍式狂掃，要攝位先可以講到嘢」，話之鋒由於仍係新人階段，未被分派工作，近日已打算學Photoshop，相信出獄後，可以幫眾志整海報。阿臻又話，逢星期日或公眾假期，囚友都有一杯奶茶，之鋒就愛上咗呢杯奶茶，成為咗佢嘅動力，阿臻據聞，呢杯茶係早前曾入獄嘅劉夢熊爭取番嚟㗎！
除咗奶茶，阿臻話之鋒最想知多啲監獄外嘅情況，希望大家可以多啲寫信畀佢，仲問過阿臻可唔可以將facebook上嘅時事新聞或趣聞cap圖，再印出嚟寄畀佢。

之鋒又話，自己同囚友相處OK，被稱為「鋒仔」，最多囚友問嘅問題係「點解可以吹到咁多人上街？」同「游蕙禎真人靚唔靚？」，據知之鋒聽到有關問題都忍唔住笑咗，搞笑咁答「游蕙禎喺政界梗係靚」喎。
阿臻又透露，為咗關心早前喺政府「追殺」下，被判監嘅反新界東北發展案13名社運人士同雙學三子，工黨立法會議員張超雄好有心，近日用Excel整咗個類似返工嘅「更表」，讓不同民主派議員可以喺不同時間探望呢16人，阿臻下星期就會再去探兩名社運人士。


李八方