泳兒由細到大都視母親為最好嘅朋友，15年母親突然腦出血，幾乎令泳兒崩潰。幸而，泳兒遺傳母親堅強嘅性格，企返起身，撐起頭家。

事隔一年多，泳兒母親目前情況穩定，但每講起母親，泳兒都忍唔住喊：「呢件事將我嘅人粉碎咗，跌晒落地，要將自己每一片重組，拉番自己起身。有啲招架唔嚟，突然間覺得好寂寞！媽咪係我最Close嘅人，無論開心唔開心，有乜嘢都會佢講；同樣媽咪有煩惱，可能係同爹哋、細佬嗌交，佢都會同我講，佢又好鍾意嚟我屋企hea。突然間發生呢件事，我覺得呢個世界好似剩返我自己一個人。」

泳兒忍住傷痛，逼自己要堅強，企返起身：「我都知自己唔可以冧，屋企仲要靠我去撐住，我要盡做女同家姐嘅責任，要代媽咪睇住屋企，照顧爹哋同細佬。」

泳兒又話今次事件俾佢好深嘅體會：「我係外柔內剛嘅人，同媽咪一樣好倔強，好捱得辛苦。經過呢件事之後，我覺得更加強大，冇乜嘢會比呢件事更大打擊；我o依家有個心態，就係冇嘢會怕，乜都做晒先喇，反正最差嘅嘢我都體驗過。有啲嘢要快啲做咗先，生命嘅嘢係預料唔到，可能呢一刻你好健康，但係下一刻會唔知道發生乜嘢事，所以唔好令自己有遺憾。」

有啲說話雖然好難宣之於口，泳兒就覺得：「以前做人好怕醜好含蓄，唔會同身邊人講『我愛你』、『好掛住你』，但o依家會覺得就算好肉麻都要講，唔好吝嗇啲甜言蜜語。」