當年今日
關於我們

【月尾做手術】舌癌淋巴癌後小腸有4cm腫瘤 洪朝豐心情平靜:交畀個天

蘋果日報 2018/12/25 15:24

腫瘤洪朝豐舌癌

洪朝豐去年證實患上舌癌同淋巴癌,要切脷同電療保命,今年10月洪朝豐發現右邊頸部突然腫起,一度擔心係癌細胞由左邊擴散去右邊,好在後來檢查報告出咗話唔係。
下個月5日係洪朝豐59歲生日,近日佢將自己抗癌經歷寫成新書《風雨之後─我的舌癌筆記》,並準備下個月12日舉行新書發佈會。
點知今日洪朝豐喺facebook留言,話今個月尾要做手術,又話生日會喺醫院度過。佢喺fb連發咗兩個同朋友食飯預祝生日嘅post,留言話:「平安夜生日飯第二波。有魚子醬,烤燒牛肩肉,蕃茄芝士沙律,煙燻燒鵝,炒牙菜,青菜。12月31日手術前,還有第三第四波。邁向虛齡六十歲,今年想多吃生日飯。1月5日生日那天,大概要在醫院渡(度)過了。我許了一個願,祈望新書面世,可以幫助到許多人。希望讓黑暗中的人,感受到一點溫暖,看到一點光明。」
《蘋果》今日打畀洪朝豐,原來佢近日小腸發現有腫瘤。佢話:「小腸有腫瘤,個腫瘤都成4cm,唔知係良性定惡性,要切咗出嚟先知,醫生話試吓做微創,如果唔得先至開刀。原本我新書發佈會係下個月5號我生日當日舉行,但我啱啱出院,醫生叫我休息幾日先。」
問佢擔唔擔心?洪朝豐笑住話:「我個心都好平靜,個天安排畀比我喺2018年最後一日做手術,一切就順其自然,交畀個天,我會期望最好,但作最壞打算,我有咁多人寵愛,都夠啦!」洪朝豐話個仔喺英國工作返唔到香港陪佢做手術,不過前妻葉桂好會陪佢,令佢相當感激。
精選娛聞,喺晒《娛果》
http://fb.com/appledailyent
empty
洪朝豐今日fb留言話本月31日要做手術。(facebook圖片)
empty
洪朝豐下月5日59歲生日。(facebook圖片)
empty
同朋友預祝生日。(facebook圖片)