相隔三年徐小鳳再度喺紅館舉行6場《金光燦爛徐小鳳演唱會2018》，噚晚順利完成頭場演出，小鳳姐今次邀請到青山同張帝，兩位來自台灣嘅前輩級歌手助陣擔任嘉賓。首先有青山同小鳳姐手拖手唱出《今宵多珍重》，青山向小鳳姐表示大家由以前喺歌廳同夜總會跑場時已經認識，小鳳姐就透露父母都係青山嘅歌迷：「仲記得以前會邀請你嚟我屋企食飯，媽咪會煲湯畀你飲，而我得月尾出糧先飲到！」

之後小鳳姐又發揮風趣本色，向青山講：「聽講你發財啦，成條『青山道』都係你嘅，又唔見有『小鳳路』？」點知青山仲抵死，用廣東話答：「我仲有間醫院！邊個想去？有8折！」引得觀眾大笑。跟住小鳳姐又講到青山後生時有好多靚女圍住，自己都唔敢行近，估唔到對方咁講得笑。

隨後就到張帝拎住鮮花上台送俾小鳳姐，仲埋怨對方淨係搵青山做嘉賓冇自己份：「我好衝動，又好難過，所以就買通導演，用了很多錢才能上台。」隨後又將小鳳姐嘅《順流逆流》改詞，變成讚賞對方，臨走前仲唱多一小段《月亮代表我的心》，向小鳳姐示愛，逗得觀眾拍爛手掌。

到Encore環節，小鳳姐著上招牌嘅黑白波點裙現身，仲邀請第三位嘉賓蓋鳴暉上台合唱《帝女花香夭》，最後再唱出《順流逆流》為演出畫上句號。

小鳳姐演出後表示滿意演出，講到嘉賓青山及張帝會做足6場嘉賓，佢話：「30年前已經應承請佢哋做嘉賓，到依家先實現，真係好抱歉。」雖然台上小鳳姐同佢哋落力打情罵俏，但佢話只係演出需要：「大家對大家嘅歌聲都好仰慕，佢哋又好唱得，我諗佢哋今次係第一次正式認識我，以前冇咩機會咁一齊做騷，都好多謝佢哋。」

講到演唱會上揀選陳百強嘅《有了你》及《今宵多珍重》，小鳳姐話：「今年係Danny 60歲冥壽，本來我都被邀請出席佢紀念音樂會，但同我個騷撞期，所以先喺呢度向佢致意。」小鳳姐又話當年喺片場Danny彈琴俾佢聽：「佢應該係彈緊《等》，唔知佢係咪想畀我唱，但好彩唔係，否則首歌冇咁Hit。」

小鳳姐向來轉數快，而且風趣幽默，問到佢有冇諗過開Talk Show？佢笑笑口話：「冇諗過，我都係見到咩講咩，如果要我背就慘。」但連黃子華都話收山，靠Talk引觀眾笑嘅藝人真係唔多，小鳳姐卻話唔信對方真係收山：「佢車大炮！我唔信佢！」

精選娛聞，喺晒《娛果》
http://fb.com/appledailyent