當年今日

行街風景各不同 - 左丁山

蘋果日報 2002/03/30 00:00


大賓架李國寶說話率直,夠晒風趣,係記者嘅至愛,有機會用咪扑佢講番一兩句,編輯一定採用,皆因夠晒娛樂性也。
星期二晚睇有線新聞,李國寶講東亞銀行凍薪;記者問佢:「艾爾敦話經濟有復甦迹象,你有乜睇法?」寶哥哥答得真妙:「或者佢行嗰條街同我唔同啦,我行街就見到好靜,酒樓生意幾清淡噃。」
艾爾敦係英國人,行街或限於山頂、中環、淺水灣、馬場,與李國寶行經嘅街道唔相同,一啲都唔奇。呢排左丁山行過一輪彌敦道,街上行人你撞我,我碰你,真係旺到不得了,但係唔係旺丁不旺財呢,木宰羊。
一晚行到去寶哥哥、艾爾敦都會時時去嘅深水灣鄉村俱樂部,發覺地下中菜廳的確係好清靜,會員都唔多一個,生意確係難做喎,鄉村俱樂部啲會員唔係闊佬就係打工皇帝,去晒邊呀?成班賓架在樓上集會,其中一位對左丁山講:「淺水灣海都平時都係好淡靜,只有星期日中午飲茶先至爆棚。」
啲高檔次餐飲地方都咁靜,唔怪得李國寶睇唔到經濟復甦迹象啦。另一方面,上個星期四左丁山到文華頂樓文華廳食晚飯,只見出面嘅酒吧逼到轉唔到身,熱鬧異常,人客幾乎全部係外籍人士,好旺啫,又唔怪得艾爾敦見到復甦迹象。
經濟像霧又像花,行多幾條街,愈發分辨不清。