2014年係皇家馬德里揚名之年；2015年1月，基斯坦奴朗拿度（C朗）當選金球獎，個人生涯推到另一個高峯，但係嚟到2月，巴塞隆拿粉絲終於可以大聲講嘢，11連勝佳績拍得住哥迪奧拿領軍年代，其中美斯不斷以「神樣」演出，說明同C朗之間比拼仲係未完。2015年美斯失落金球獎，但係呢位無冕球王已經向住2016年金球獎進發，噚日個人第300場西甲上陣，結果造出第23次聯賽「帽子戲法」，西甲總入球達到269球、助攻107次，數據刷完又刷，唔係美斯粉絲，可能已經有啲麻木，但數字唔會呃人，阿根廷人之統計強橫，世間上要搵對手，真係冇乜邊幾個。

單計2015年頭個半月，美斯統計數字係14球、9助攻，歐聯還未再開波，只係計西班牙賽事，而且對比起皇馬神風「BBC」組合，三個人夾埋先至得11球、6助攻，唔怪得馬德里體育會教練施蒙尼曾講過，美斯一個人帶波，仲危險過皇馬「BBC」一齊上陣。當然，美斯同C朗邊個勁啲，呢個無休止問題，相信到兩個人退休後都仲有排拗，唯有睇數字最實在。