韓國超人氣綜藝節目《RunningMan》(RM)主持Gary今日出席將軍澳新都城中心舉行嘅世界盃活動,引來千名fans圍觀,迫爆商場。
首次單拖來港宣傳活動的Gary相當識做,大講廣東話之餘,跟fans又擁抱又自拍,冧爆fans。不過Gary事後叫大家向「周一情侶」宋智孝保密,免得智孝呷醋喎。
今午一時,Gary以全黑簡約造型現身新都城中心,出席《巴西狂X足球熱》揭幕禮暨「Gary首個個人香港FansMeeting」。甫出場佢就用廣東話同fans打招呼:「大家好,好多謝大家等我。」主持人見Gary廣東話幾流利,問佢覺得廣東話難唔難,Gary話廣東話好易學,仲用廣東話跟fans講「我愛你」,fans聽到真係high到暈呀!
提及今個月就係世界盃,Gary話世界盃係四年一次嘅盛事,希望今年韓國國家隊可以晉級,又用廣東話話:「韓國加油!」佢鍾意同朋友約埋睇世界盃,又會準備炸雞同啤酒,如果可以嘅話,佢都想同RM成員一齊睇賽事。
他亦談及早前同南韓球星朴智星到印尼參加足球比賽,話自己已經盡咗力。對於RM成員金鐘國喺印尼感染病毒要入院治療一事,Gary感謝大家關心,表示金鐘國身體好好,更笑言金鐘國係機械人:「能力者要增加能力就得過關,他(金鐘國)過了這關之後會變得更強勁。」