茶餐廳︰睇皇馬唔好睇表面
侍仔:世界盃完咗成個月,今季4大聯賽又就快開波啦!
招積域:咩都可以忍,但睇波就唔可以!忍得多連人都要變儍。
菠蘿文:有冇咁誇張先?我7月初到𠵱家都無咩睇波,但都唔覺有所謂「餓波症」。係你哋想嗱嗱臨喺新球季露兩手啫!
侍仔:好想睇今季皇馬,會唔會真係有番新氣象。新領隊、新球員、新目標。
招積域:係喎!反骨仔卡比路過檔皇馬,仲有雲佬俾費sir放逐到西班牙……雲佬、魯爾同肥哨。唔知佢會出邊兩個呢?
菠蘿文:3個都28-30歲,今季踢唔到好成績,就真係要經歷2、3季調整先啦!皇馬表面好氣象,但似乎都捱唔過今季。
侍仔:車!我嘅雲佬一定證明畀費sir知,貶佢做後備係一個錯誤決定!當年科倫都用歐洲金靴獎塞住費sir把口。
招積域:唔係啩?雲佬可以拎金靴獎呀?佢連正選有冇得踢都未知。
菠蘿文:唔好講佢啦!講吓嚟緊今個星期六場波啦!
侍仔:上海申花對傑志,同港隊對新加坡?
招積域:初時以為前德國國腳贊卡會有啲嘢睇,但上次睇佢對曼城嘅友賽,成支燈柱咁企喺度。
菠蘿文:咁即係冇料到啦!衝又唔掂、頂又差少少。
侍仔:佢喺烏甸尼斯同凱沙羅頓時候已經走下坡啦!我唔期待佢星期六會有咩嘢表現。
招積域:吳偉超傷咗,希望到時佢有得踢啦!但唔知佢會踢邊場呢?
侍仔:聽講先幫港隊,後踢申花喎!
文︰高洛文