啱啱先出完部DX6340冇幾耐,柯達話咁快又有新機到場,今次DX6440在外形上照沿用DX系列機身,都唔係咁易認得出。像素就由300萬升至400萬,廠方稱最大可列印20×30吋相片,直頭做Poster都得。在操作上因照顧家庭用家,當然愈簡單愈好,所以機背一個大轉盤就可以選擇快門先決、光圈先決或者自動模式,亦預設多種拍攝模式,運動、人像、微距及遠景等,用家唔使自己慢慢校,擰幾下就搞掂。
閃光燈亦加強了,範圍達17呎,就算黑暗環境都相當夠火力,加上4倍光學變焦及3.8倍數碼變焦,唔使行近一樣影得清清楚楚。售價為$2,990,作為入門家用機亦都算合理,在功能上亦可以勝任。
記者、攝影:劉耀祥