「傳說中有個女王在世上,長長頭髮,兩眼似星光……」呢首80年代日本經典動畫《千年女王》嘅插曲《傳說》,無論係露雲娜嘅原唱版本抑或梅艷芳唱嘅版本,都會勾起大家童年美好回憶。
相信唔少人細細個嗰陣,都經常會將《千年女王》女主角雪野彌生,同另一部經典動畫《銀河鐵道999》女主角美達露撈亂,事關兩套動畫都係出自日本動畫大師松本零士手筆,兩個女主角個樣幾乎一模一樣。不過,嚟緊兩位女主角會同佢哋「親生老竇」松本零士「親臨」香港,都時咪可以慢慢睇真啲囉!
其實今次係松本喺將軍澳東港城舉行嘅「松本零士聖誕幻想時空」展覽,嚟緊星期四(29日),原作者松本親自嚟香港出席開幕禮,到時現場會有兩個1:1嘅雪野彌生同美達露公仔,又會有3D實景同松本手稿以及珍藏等等。最搞嘢嘅係,日本經典漫畫《小甜甜》嘅殿堂級漫畫家五十嵐優美子,特別為松本今次展覽造勢,重新繪畫《千年女王》雪野彌生及《銀河鐵道999》女主角美達露,見到佢哋嗰對「甜甜」大眼睛,好有「甜甜style」。
除咗五十嵐之外,日模松岡李那重為今次展覽擔任形象設計,用千年女王同美露達做藍本,設計出婚紗、印第安、埃及、LadyGaga等10個唔同造型。日前松岡為展覽做最後準備,例如幫公仔模型梳頭、黐眼捷毛同着衫等等,而佢甚至戴埋長假髮扮埋千年女王一份添!松岡雖然係80後,但佢話自己都有睇過《銀河鐵道999》呢套動畫,今次可以做形象設計,佢覺得好開心好榮幸。問到在設計上遇到甚麼困難?松岡話:「呢個係人形公仔,唔係真人,所以有啲難度。」今次設計有冇比過男友林德信過目?佢就笑住話:「冇睇過,因為我冇話畀佢知。」
無綫喺1981年播映嘅《千年女王》同名主題曲同插曲《傳說》,原唱者係露雲娜,但無綫後來要力捧梅艷芳,於是喺83年換咗阿梅版本。嚟緊星期四松本零士舉行嘅展覽開幕禮,露雲娜會做表演嘉賓唱《傳說》,日前佢就去到尖沙嘴商場揀衫準備周四演出。
露雲娜話咁多年嚟未見過77歲原作者松本,所以佢對今次會面都好期待。