近年越嚟越多應用程式爆紅，令IT人都特別搶手，但小朋友喺學校，玩電腦就多啫，接觸電腦程式嘅機會就比較少。

立法會資訊及科技界代表莫乃光(Charles)同黃岳永(Erwin)呢兩位IT人，今日就安排咗一班初中同學，同佢哋一齊「再培訓」，原來係一齊體驗吓寫程式，以及用平板電腦寫程式控制機械人。

Charles話成20年冇寫過code，估唔到初中學生上手仲快過自己。佢話好多國家已經有政策，所有學生由小學開始都要寫程式同接觸機械人、3D打印，香港唔想落後，就要比多啲資源學校嘞。