2017年香港小姐競選已經曲終人散，所有獎項已經名花有主，冠軍由5號雷莊𠒇奪得，雷莊𠒇仲攞埋最上鏡小姐，成為雙料軍軍，亞軍係1號何依婷，季軍係4號黃瑋琦。雖然冠軍一直係賽前大熱，係好多人眼中嘅大熱門，不過仍然有唔少網民質疑點解佢可以攞獎！

唔少網民去咗TVB嘅fb page留言，大派嬲嬲，有人覺得係咪因為要俾面叻哥，所以俾5號拎冠軍，亦都有人覺得賽果一早內定好，真係夠晒公平！仲有人話：
「假的真不了，假的太假了！醜的輸不了，醜的太醜了！還我千雪冠軍！」
「乜今晚選賓賓姐姐咩？」
「第一名果個個口好大呀，又哨牙，點可以做第一呀！」
「唔識聽廣東話都做到香港小姐！」
「一開始見到5號就已經深深覺得是內定三強。只不過我都是太單純，竟然以為她最多亞軍！」

除咗官方平台之外，喺「親子王國」嘅討論區裡面，有網民開post講冠軍，有人覺得睇完今屆港姐之後，先發現舊年嘅港姐原來係咁靚，亞軍劉穎鏇如果今年先參賽，分分鐘成為冠軍。講到雷莊𠒇，有人覺得佢嘅外型有啲似「人妖」，甚至有人話！
「5號棚牙趕客！」
「攞最上鏡已無言，冠軍仲......」
「佢件晚裝都突出Ｄ啦！好有造馬ＦＥＥＬ！」

「King Jer 娛樂台」嘅facebook專頁都有提到呢件事，仲有網民拎返當年嘟姐同子華一齊拍嘅《男親女愛》出嚟，當中子華嘅對白就話：「唔使講啦，又係啲選美高層，全部都內定嘅，仲有咩好睇？」呢個截圖嘅留言好多網民都好認同，話係子華神預言，不過都有網民話：「預咩言，一路都係咁。二十年前係咁o依家都係咁。」