高伯新上周三已贏夠16場畢業，放諸職業足球，不少球隊護級成功後便會打風流波，但剛周日高伯新仍贏頭場，賽後還坦言嫌自己兵源不足，會趁近期氣勢盛贏得就贏，務求得到馬主賞識加盟旗下。

過往高伯新以贏大賽省靚招牌，今季則此情不再，要搵今季代表作吸客，可能要靠今期在第五場三班1800米，衝三連捷的「文藝學家」，前仗贏三班谷草一哩，拉士造22秒1由包尾變第一非常厲害，並非一般三班馬能夠做到，但在谷草要靠留到尾追贏，按統計風險極高，然而按上仗「文藝學家」於谷草1650米爭連捷，潘頓刻意跟得較前一樣夠贏。少了輸蝕跑法的憂慮，「文藝學家」今仗仍在三班交鋒擺明超級，可繼續衝頂。

同場廐侶「康樂神駒」上仗揀了當晚不利的內欄跑線後追第四，今次有機會與「文藝學家」構成馬房連贏。高伯新同場另一駒「精壯神駿」上仗轉倉初出賽前試閘討好，但跑1000米全不合腳法，今次增程合適得多，本身積存不少減分，高伯新靠這條馬房三重彩做金漆招牌，絕非不可能任務！