花旗股市上個禮拜五跌咗成兩百點，前晚好醒，反彈咗百幾點，可惜守唔到尾，收市微跌，技術走勢已差咗好多。雖然昨日港股都好硬淨，仲升過百幾點，但係收市都係要跌，如果唔係期指結算效應，應該唔會跌咁少，今日係期指結算前夕，係好淡雙方最重要嘅搶灘日子，如果昨晚花旗股市跌得多，淡友今日有機會搶番兩百點。不過，自從恒指升破咗21000之後，好友已經掌握大局，除非花旗大插，否則結算之後港股都係睇好。

大市昨日都幾靜，不過原來都仲有742億元成交，你話港交所（388）係咪好掂呢？港交所呢兩日回番啲，只係技術調整，遲啲又會炒番上去，先前介紹過嘅C輪又可以候低撈過。
中移動C輪9396：中移動（941）昨收84.8元，調整1日又升番，仲係「破腳穿頭」嘅形態，暫時都會係支撐大市嘅主力，保險股回緊氣，佢嘅責任更加重大，好友又點會唔知？呢個時候買中移動C輪有值博率，可以買啲9396，隻輪昨收1.09元，槓桿7.8倍（有效5.8倍），正股有機上試93元，見呢個價隻輪會喺1.75元樓上，正股跌穿81.6元止蝕。