葉德嫻（Deanie）今日以「榮譽耆跡天使」身份，到鑽石山出席賽馬會「腦動耆跡」計劃閉幕禮，呼籲各界關懷不幸患腦退化症人士。Deanie姐話係第一次獲邀參與活動，覺得好有意義，佢話：「每個人都會老，老咗就會懵懂，所以依家幫人即係幫自己，萬一他日我有咁嘅需要，都希望有人幫手。」

咁Deanie姐身邊有冇長者不幸患腦退化需要特別照顧？佢抵死地話：：「我囉！就快㗎啦。」又話自己向來都冇記性，咁拍戲背對白呢？佢笑言：「拍戲對白唔使記㗎，望住張紙講之嘛。」不過Deanie姐都分享咗平日喜歡做瑜伽倒立，佢話：「呢種係效果最高嘅動作，我大概做咗十年每日一個鐘，所以依家鬧人仲係好叻，我都做到仲有邊個做唔到？」

談到工作，Deanie姐話暫時冇電影傾緊，笑言：「除咗做《桃姐》，應該冇戲啱我呢啲老人家演，依家做自己鍾意嘅嘢，而且我又懶，唔係每樣嘢都鍾意做。」

精選娛聞，喺晒《娛果》
http://fb.com/appledailyent