人在歐洲，打開電視睇新聞，都有評述香港情況，根據我近距離觀察，當地政府雖然想要賺人民幣，但唔會放棄原則，因為人地個政府，事事要向人民透明公開交代，簡言之就係有check and balance。

睇番香港新聞反而得啖笑，見到陳茂波率團訪英，自己個政府搞到香港立立亂，仲好意思叫人地FinTech公司來港發展？事實是，創新科技署在去年推出「科技人才入境計劃」，實際的申請人數已有所減少。

外國人隔住個電腦屏幕睇香港，睇住啲外國記者、普通人，落街參與示威遊行又好，採訪嘅又好，竟然要面臨隨時俾警察凶，鬧下佢，就打你濫捕你，咁仲可以點吸引人才？外國人生活裡頭，習慣咗人身自由受保障、有識得守法嘅警察。

最妙嘅係，同團台灣記者朋友，訪問一位芬蘭圖書館員，問佢圖書館對於城市嚟講，係一個點樣嘅地方？

個職員答佢「圖書館應該是個安全的地方。」然後佢再話，個幾月之前，有幾個香港人借用圖書館的特殊列印設備，整咗幅巨型「支持香港」海報；結果有幾個中國人睇到，就立即氣沖沖咁向佢抗議，要求阻止呢種行為。

職員膠都費事派，只係引用當地嘅「圖書館法」答覆幾位中國人：「根據我國法律，圖書館鼓勵公民運動、民主與言論自由。」直接叫佢哋過主！

文明呢家嘢，真係入骨入血，有就有，冇就係冇，你個國家有再多錢又點，人地啋你都有味。相反嚟講，香港若要吸納外國人來港發展，唯一嘅辦法，係要真正對得住「國際城市」呢四隻字，同返國際社會接軌，包括尊重人權，言論自由、新聞自由，咁至能夠繼續得到國際認同，人地至會考慮嚟你啲所謂「機遇」。

否則，情況只會變本加厲，唔止冇人願意來港，就連已經嚟咗嘅人，連喺度出生嘅人，有條件有能力嘅都會走，選擇出去外邊闖蕩。

我喺愛沙尼亞見番嗰朋友，佢由香港過去打工然後科技創業，至今已經3年半，佢嗰女最近出世，由於愛沙尼亞請人唔平，再加上想近住客戶同投資者，未來考慮搬去其他國家，但就斷言唔會返香港，因為唔想細路食TG放題。

聽罷堅係心酸，忽然諗起赫爾辛基搭船嗰陣，見到成群海鷗遨遊天際，就好想每個香港人都一樣可以，好似海鷗飛飛萬里，邀游在天上遠飛，飛到天邊的盡處，夕陽下千萬明媚。

尹思哲

investMAN
For People of Style & Substance
掌握理財智慧 感受生活品味
http://investMAN.hk