港股又大升,升幅比預期大,恒指升192點,期指更大升256點,美中不足嘅係成交只得168億元,好多人睇唔通,唔敢入市。
大市回升,暫時未有走出上落市嘅範疇,但恒指若能在14000至14300內企多兩三日,中期形勢又會轉好,唔排除會破位而上。事實上,港股上到呢個水平,好淡爭持已愈來愈激烈,家下要睇窩輪發行商點做,但即使佢哋真係要㩒低計價,極其量只係將升市開始嘅時間再推遲一兩個禮拜而已。
大藍籌齊齊發威,滙控(005)收124.2元,升1.2元,長實(001)同和黃(013)收75.05元同71.40元,分別進帳0.95元同1.15元。後市若大升,滙控同長和都會成為火車頭,一波就指下半年息差改善,以及港元滙率及債券轉強,對滙控有利,維持其「優於大市」評級,目標價150元。
另外,大摩報告就指和黃盈利能力強勁及價值吸引,故將其投資評級調高至「增持」,目標價提高至90元。美林報告指內地電訊業重組推遲,以及第3代流動電話推出,有利中移動(941)保持行業競爭優勢,調高其05及06年盈利預測至454.7億元及505億元,目標價由29元調高至36元。大藍籌紛獲大行提高評級同目標價,有助增強投資者信心。
國企回升,國指收4851,升41點,中鋁(2600)同吉化(368)都升約5%,上石化(338)同鞍鋼(347)亦有2.8%進帳。早輪推介伺機低吸的哈爾濱動力(1133),噚日高收2.975元,升0.15元,升幅5.3%,調整完成,升勢再起。