人怕出名，四叔李兆基細佬、人稱五叔嘅李兆楠被傳媒大起底，披露佢持有價值150億元嘅平安保險股份，隱形富豪身份曝光後，好多記者蜂擁順德大良李氏祖屋追訪佢，八方同事登門造訪，見識到老人家真性情一面。
雖然五叔身家多到你唔信，不過平日生活低調而且好平民化，據街坊講，五叔夫婦鍾意去屋企對面酒樓飲早茶，同老友打牙骱過日辰。部長爆料，話好多街坊知道李兆楠係香港富豪李兆基細佬，但真係唔知五叔竟然有過百億元身家，「佢哋通常朝早六、七點就嚟飲茶，有時坐包房，有時坐大廳，同普通街坊冇分別。」

五嬸買點心撐枱腳

呢間街坊酒樓陳設普通，消費經濟，有夥計透露，五叔兩公婆多數食粥同包點，唔會叫到成枱點心咁奢侈，近日天氣冷，五叔冇咁早出門飲早茶。八方同事噚日八點鐘左右，見到五嬸陳桂芳一個人去茶樓買外賣。
五嬸打扮樸素，入到茶樓同幾個老友打招呼後，買完點心就急急腳離開，佢邊行邊講，話買點心返屋企同五叔撐枱腳，行冇幾多步已經返到李宅，佢㩒鐘後，五叔開門畀老妻，不過見到有記者在旁即面色一沉，八方同事問佢名下平安保險股票係咪代四叔購買，佢耍手擰頭，顯得唔係幾耐煩，仲忽然爆粗，回贈一句「×那星」就「嘭」上大門。
四叔係順德人，份人好易話為，過去兩年揀股買股手風順，經常公開指點散戶，被譽為股神，早前自拆招牌話自己係「冒牌股神」。雖然佢唔做股神，但仍然好順得人，如果有人問佢邊隻股會升，佢都會畀個冧巴散戶，至於五叔一句三字經，係「×那星」定係「挑那升」？究竟指邊隻股會升呢？平保、內房股定石油煤炭股呢？八方一時間參透唔到箇中玄機，有機會一定要請四叔解釋。

唔講股做家事顧問

近排四叔要兼顧「郭家大事」較少講股，好似做咗家事顧問，奉勸做人子女「應該聽阿媽話」，又話富不過三代，而最新金句「六耳不同謀」，八方考證後，發現原來出自宋朝釋普濟《五燈會元》，「六耳不同謀。且去，來日去。」原意係指有三個人知道嘅事就不能保守秘密，後來比喻輕信傳聞無益，四叔字字珠璣，五叔句三字經應該都唔簡單。
電郵：mailto:[email protected]