據美國傳媒爆料，公牛曾經喺六月向獲迪（Dwyane Wade）保證新季有力爭標，所以呢位35歲老將先會喺今夏答應執行尚餘一年2,380萬美元合約、續效公牛。不過，獲迪宣佈留隊兩日後，公牛就喺NBA選秀會送走占美畢拿（Jimmy Butler），換來拿維（Zach LaVine）、鄧恩（Kris Dunn）同馬克根尼（Lauri Markkanen）等新星似乎想開始重建，獲迪就梗係覺得受騙啦。

有消息指獲迪喺呢宗交易後，就冇同公牛管理層任何一人講過嘢，同球隊嘅關全亦變得緊張；《ESPN》上月亦指出獲迪唔會長留公牛，有意喺月內買斷合約，據悉熱火、湖人、騎士等球隊都有意簽入呢位35歲老將。