多得特區政府好「帶挈」，傳媒今日個個忙到爆廠，估唔到今晚星島80周年晚宴兼年度領袖頒獎禮，星島老闆何柱國都爆seed批評《逃犯條例》修例影響營商環境。嘩！連全國政協常委都炮轟，似乎佐證修例堅唔係北京主意喎。

話說「炒何」致辭時話，商界會歡迎政府就《逃犯修例》修例作出一啲修訂，但認為仍要進一步釋除商界疑慮。佢繼而嚟料話喎，有個朋友向佢「吐苦水」，話唔知明年仲見唔見到佢，因為擔心被引渡，其後又指如果要引渡，梗係揾個法治同政治制度同香港水平差唔多嘅地方，但有別於大陸，香港係實行普通法㗎喎，而呢個係「一國兩制」最關鍵要素，所以同非普通法國家接洽時，要諗清楚唔好衝擊普通法，等香港有個良好營商環境。

佢又提到台灣預告會喺通過修例後發旅警，質疑政府到底冇同台方傾過？形容內地生意人以往一到港就「如沐春風」，希望將來都係。之前林鄭咪話過，佢帶領嘅訪京團獲國家主席習近平接見後，每位團員都「如沐春風」，「炒何」用呢四粒字，可圈可點。

之前因為土地問題同林鄭「交鋒」嘅「炒何」，今日發言繼續火花處處，先寸爆話特首叫佢唔好講咁長，話要趕住走，「自嘲」自己係咪應該講短啲先，等佢走咗之後先繼續講？

「炒何」致辭時一度又提及，內地好多官員做官好辛苦，一個不小心，隨時被人鬥落嚟，唔似得香港嘅特首……呀唔係，應該係官員至真，讀書讀得好，就可以穩定升職嘞。今次林鄭無再講「拭目以待」，台下默默聽，收斂唔少傲氣。

-----------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
《動腦Q》周末主題夜
追加星期六、日 9:30 pm
星期一至五 10:30 pm
Day Day Q the money!
https://hk.adai.ly/UkZT7poxmV