當年今日

第24屆省港盃足球賽花絮

蘋果日報 2002/01/07 00:00


告別東校場贈5千飛 可容納三萬球迷嘅東校場,噚日進行省港盃告別賽,雖然有成八千幾觀眾入場,但據了解,八千球迷中有接近五千係贈券。無計啦,今屆賽事門票最貴賣一百五十蚊「人仔」,比香港重貴,真係搵鬼睇咩。

廣東啦啦隊搶晒鏡
以往省港盃,廣東各部門都會自發性帶備橫額入場支持主隊。不過,噚日東校場入面嘅球迷,只有為數幾十人嘅啦啦隊較為搶鏡,佢哋個個着上藍色波衫,頸帶中國隊頸巾,全場幫廣東隊打氣,當然最後都可以盡興而回。

今屆公安鬆口氣
記得上屆東校場舉行省港盃,因賽前一場國內聯賽發生球迷擲物事件,令當屆保安嚴密非常。今屆賽事,雖然球迷入場前都照例被公安檢查搜身,但氣氛就無上屆咁嚴肅,一班穿上整齊嘅公安大佬,終於可以坐定定睇波。