相比同屬港姐出身嘅陳凱琳、蔡思貝、劉佩玥等等，07年港姐出身嘅傲兒BB嘅發展，真係麻麻地。莫講話佢哋，就連遲佢一年選港姐、但比佢年長一年，但個樣又好鬼似嘅高海寧，入行7年已經升呢做業主買將軍澳緻藍天，傲兒BB仲努力緊。

去年四月，傲兒BB嘅爸爸何世根去年因無力償還欠債，自行申請破產，傲兒傲芝兩姊妹撐起頭家，可惜傲芝又因為黃翠如介入、同「雪雪雪」蕭正楠分手，後來更不獲大台續約；傲兒演藝事業未遇到貴人，幸好有契爺林建名出手相助，又有西貢地王之子周子揚呵護，咁先至冇咁驚豬。至於何父嘅破產官司，因為有八成債主同意唔使何世根還錢，故本來欠債千四萬嘅，最後只爭二百萬債項未還，獲擱置破產令。成件事就好似坐過山車咁。

最離奇仲係傲兒BB閃電戀上周子揚，被拍得喺宜家錫錫斷到正，嗰頭傲兒BB又話自己接受唔到同男仔喺公眾場合行為不適當(即係同男方激吻啦)，更話自己當時唔識得sayno同埋冇經驗去處理，又謂家人見到呢啲報道之後都好嬲；未完0架，仲有當時77歲嘅林建名為傲兒BB流淚單嘢呢……

其實何氏姊妹花仲有另一樣嘢為人津津樂道，就係佢兩個同爸爸都係馬場常客，依家傲芝仲做埋馬評人添…