韓國男團EXO上年同今年發生大地震,團中嘅中國籍成員Kris、鹿晗同Tao先後單方面退團,仲企硬要同原屬嘅SM事務所上庭開戰。
繼Kris同鹿晗打極都打唔完嘅官司之後,噚日就到Tao同SM進行第一次辯論,當然Tao本人就冇出席,只係派代表律師去韓國同SM方面開戰。
Tao嘅代表律師就表明合約喺彼此失去信任時就可以廢除,更指出Tao同SM所簽嘅合約長達10年,而標准合約書年期只係7年,但SM就利用外國人可以延長合約3年而將合約加長至10年,又指摘10年合約並唔係由Tao入公司開始計算,而係由出道開始,完全唔符合標准,律師指:「以長期合約留住歌手係侵害個人人格權同人身自由」。另外Tao嘅代表律師亦再強調SM對團中嘅中國人同韓國人有差別待遇呢一點。
對於Tao代表律師嘅指控,SM方面就作出反擊話公司有遵守合約內容,又話由出道開始需要10年嘅栽培同投資,呢種投資冇保障。不過SM方面都承認因為Tao係外國人所以延長合約年限,不過就話從來都冇對任何成員有差別待遇。
拗完一輪之後,都係同Kris、鹿晗嘅情況一樣冇結果,要等到12日5日進行第二次辯論。
至於團中現時惟一一個淨低嘅中國籍成員Lay近日亦都惹嚟「想退團」疑雲,話說EXO喺下個月就會喺日本正式出道,仲會搞巨蛋巡演,不過噚日SM方面就公開指Lay因為喺中國有個人行程,所以會缺席今次巡演。
粉絲得知消息之後第一時間就擔心Lay係咪有退團諗法,又擔心Lay消化唔到太多行程,影響健康。