【香港冇代表歌手】去到紅館係成功? 陳海琪:Sorry,呢啲唔係成功
海琪的天空陳海琪悠長假期
「電台係好純情嘅地方,單純到令人感動嘅,人際關係好簡單,做節目1個人就搞掂。」資深唱片騎師陳海琪如是說。
佢,經歷過最盛世嘅FM年代,廣播道仿如大型頒獎禮嘅紅地氈,紅星往來絡繹不絕:「當時電台同音樂人嘅關係好密切,乜嘢都可以傾,大家可以交到知己。」陳海琪日前重返港台為節目《悠長假期》開咪,坐喺好似佢屋企一樣嘅錄音室懷緬住當年嘅好風景,娓娓道出昔日故事。
90年代,陳海琪喺商台首次開咪,其後做過港台、新城、大大細細嘅網台,亦都主持過電視節目。陳海琪話港台係佢嘅母校,而佢出身嘅商台呢?佢緩緩地說:「商台係計收聽率,港台嘅風格好唔同。喺商台,試過有人做2個鐘節目,做咗半個鐘,主事者(即俞琤)帶埋另一個主持落直播室換人,唔畀佢入返去,我嘅少女時代係喺咁驚恐嘅時刻渡過,係好恐怖嘅。主事者好清楚大家喺電台嘅習性,知你凌晨3點瞓,2點9打黎叫佢去開會,去到佢話:『你知唔知你噚晚12點20分播嗰首歌好好聽?』,然後就講完架啦。咁有啲人會畀佢鬧,我無試過,佢對我幾好嘅。」
提到「母校」港台,陳海琪面上不禁泛起笑意:「好熟落嘅感覺,廁所喺邊、同事都好熟,今次返黎做《悠長假期》,我想講多啲音樂背後嘅故事,好似羅大佑寫畀阿梅(梅艷芳)嘅《親蜜愛人》,絕對係阿梅嘅心聲。」依家廣播界亦比以前多範疇,好多唱片騎師做埋電視、電影,佢話:「以前林憶蓮都係去唱歌,依家有DJ帶埋團去旅行添,你問我淨係做廣播係咪唔夠食?咁都係嘅。」
「當年阿梅、Leslie(張國榮)、陳百強,個個都打拼緊,電台同音樂人嘅關係好密切,可能港台又闊落啲,嗰時又有個好出名嘅小酒吧,大家會留落喺度傾音樂、生活,交心到做到知己。我好鍾意呢種關係,大家係真心朋友,真心鍾意音樂。」佢話當年嘅前輩都好愛錫佢:「喺我低潮嘅時候,甄妮同我講『舉起左手、舉起右手都係錯』;霑叔叫我『記住,滄海一聲笑唔係一首歌,係一個境界,要好似佢咁豁達,我可能一世都唔識。」
講到香港音樂,陳海琪認為流行歌仍然係香港領先,但中國嘅資源好充足:「流行歌依然都係香港,但音樂嘅種類就真係內地多好多。」佢仲語重深長咁話:「香港樂壇真係唔爭氣,可以做得更好,前人種落咁大塊田,表演嘅形象已經去到明星級培養。以前葉德嫻錄《邊緣回望》,為咗頭一句歌詞用嘅感情,佢可以拗成晚,依家?一定無可能。依家啲唱片公司分啲部門好細,但係唔知有咩用,啲歌手好忙。唱歌最重要係情感,就算依家唔造碟,只係造一首歌,無問題,對音樂嘅態度先係問題,唔係唱幾首歌,去到紅館就係成功,唔係呀,Sorry,呢啲唔係成功。」陳海琪感歎從前嘅歌手係真正代表到香港,喺日本、東南亞都會有人識,反觀依家已經無咩代表到香港嘅歌手。
陳海琪嘅聲音溫婉而沉實,只要聽過佢主持嘅經典電台節目《海琪的天空》,都會覺得佢係個好浪漫、好需要愛情嘅女人。陳海琪直言:「我好需要愛情架,不過呢個係上帝劇本,扮唔恨就可能有架啦。」佢仲話羅文曾經同佢分享一個故事:「幸福就好似蝴蝶,你唔在意佢嘅時候就會停喺你膊頭,當你想睇清楚嘅時候,佢就會飛走。」
90年代,陳海琪喺商台首次開咪,其後做過港台、新城、大大細細嘅網台,亦都主持過電視節目。