求驗客手記︰金球獎前奪西甲最佳球員
美斯贏晒C朗
美斯喺前日舉行嘅西甲頒獎禮包攬最佳球員同最佳前鋒兩個大獎,先贏基斯坦奴朗拿度(C朗)一仗,睇怕美斯好大機會可以第五次贏得國際足協金球獎。美斯同巴塞隆拿隊友尼馬異口同聲咁話,戥蘇亞雷斯唔抵,認為「MSN」應該包攬金球獎三強。
西甲喺星期一舉行上季嘅頒獎禮,冠軍巴塞成為大贏家,擸咗五個獎,其中美斯擊敗上季神射手、皇家馬德里嘅C朗,拎咗最佳球員同最佳前鋒。巴塞門將哥迪奧巴禾奪得最佳門將,教練安歷基就拎咗最佳教練,而尼馬就獲得最佳美洲球員。
至於皇馬就有三個獎,占士洛迪古斯同沙治奧拉莫斯分別贏得最佳中場同後衞,C朗就拎咗個「豬肉獎」,被網民選為最受歡迎球員。唔知係咪知自己一定冇大獎拎,C朗連頒獎禮都冇出席。
喺西甲頒獎禮前夕,國際足協公佈咗金球獎最後三強,分別係美斯、C朗同埋尼馬,所以記者都問美斯同尼馬點睇呢份三強名單。美斯一開口就提到隊友蘇亞雷斯,「我好想同尼馬、阿蘇一齊企喺金球獎嘅頒獎台上,阿蘇值得入圍最後三強,但當然C朗都表現好好。」
23歲嘅尼馬都係咁話:「能夠入選最後三強,我覺得好榮幸,但我認為蘇亞雷斯都應該一齊入選。無可否認,美斯點都係頂頭大熱,佢係我心目中嘅世界第一。」另外,尼馬由山度士加盟巴塞份約寫明,如果佢入圍金球獎最後三強,巴塞就要畀多二百萬歐元(約1,600萬港元)山度士。
得獎者自拍,美斯(後排中)同尼馬(後排右三)就企咗喺後排。互聯網
MSN嘅關係真係非常融洽,好似一家人咁,阿蘇雖然入唔到金球獎最後三強,佢亦喺網上發佈三人合照,祝賀兩位拍檔:「恭喜我嘅兩名老友,我真係好開心,為你哋感到驕傲。」尼馬話MSN之所以咁成功,全因彼此間嘅情誼︰「MSN嘅成功秘訣?就係友情同埋謙卑。美斯同阿蘇都係我嘅老友,我哋三個都唔會淨係諗住自己,我希望可以一直同佢哋一齊踢波。」
據外國博彩公司嘅賠率,美斯拎金球獎得1.1倍,相反C朗同尼馬就有10倍或以上。其實金球獎投票一早完晒,到下個月11號嘅頒獎禮,就會公佈最後得獎者。