中大碩士生三年見工200次被拒的經歷，成為城中熱話。同是中大畢業的廣告人梁芷茵認為，見工其實講究包裝，要將自己當成一個品牌去「sell（推銷）」給客戶，「五個人見工，有人勤力啲，有人聰明啲，僱主透過呢個競爭過程，揀出最好嘅品牌」。

梁芷茵入行16年，現時是4A（四大廣告公司）李奧貝納的香港區董事總經理。每年她公司收到逾千封求職信，除了大批80後本港畢業生，還有來自世界各地的尖子，但公司只會聘請15人。不過，她說近九成求職者根本不會獲安排面試：「一睇份CV（履歷）就出事，一係冇寫上款，又或者一開始就猛講自己興趣係乜，同我請你有乜嘢關係先？」
另一常見是「表錯情」，「強項係識乜乜電腦程式軟件，但你唔係嚟應徵做電腦喎」。梁指畢業生經常誤會能夠「以量取勝」，「係CV寫自己有好多工作經驗，全部係暑假做過麥記、便利店，一大叠厚厚咁寄過嚟，基本上可以唔使睇」。
即使獲得面試機會的100名「入圍者」，很多也會犯了準備不足的毛病，「冇溫過書就嚟見工，唔熟悉行業，連見嗰份工係做乜都未搞清楚」。被問到為何想要這份工，最多的答案就是「想試吓先」──犯了大忌，「僱主唔係想請一個做一陣就走嘅新人，雖然新人起薪點會係低啲，但僱主要用好多資源培訓你」。

梁表示80後上網能力超強，但在網上與現實世界的表現往往兩回事：「網上嘅表現好大膽，但現實中問佢哋好多問題，唔係答『唔知喎』，就係『是但囉』。」簡單如自我介紹本身優點，也不懂得如何啟齒，「握手唔望人，或者隻手濕晒」。
職場如戰場，老闆面試就是要汰弱留強，梁向80後教路，見工要做足準備工夫，除了對鏡訓練口才，也應嘗試了解一下面試者背景，「如果係大公司，見你嗰位管理層，google吓應該會知道佢一啲資料。」還有事後跟進，定期向對方查詢何時有結果，以顯示誠意：「好似超級市場嘅貨架，咁多件貨品俾客人揀，你點樣先可以突圍而出？」她說最緊要令僱主留下深刻印象，「人哋肯見你，唔一定要請你。見工前，應該諗吓想人哋記得你乜嘢」。
記者　黃偉駿