貴價灰馬「銀豐神駒」到港後等咗兩年半，先首次出得賽，而且還要輸足近一年，落到四班於剛戰才開齋，練馬師Gary吳定強的心機，與馬主堅持缺一不可。

今晚(22日)快活谷第一場五班1650米，苗禮德隻「大爆發」改配史卓豐，雖然隻馬一路都跑得，但實際情況同「銀豐神駒」都差不多，此駒因健康問題，首兩季響呂健威及賀賢馬房全無表現，到今季轉投苗禮德，體重比最早期輕約50磅，但馬主Derek談立德一直唔放棄，好在最近兩場開始近番，前仗第五及上仗第四，所謂有志者事竟成，睇睇能否如「銀豐神駒」，有樣學樣贏番場。