黃子華最後一次棟篤笑《金盆o浪口》今日優先訂飛，未開賣已經知道會係好搶手，結果一開始就已經好多人話電話打唔通，網絡塞車，同時都有假訊息流傳。

真．黃子華於晚上8時45分喺facebook連出兩條片，其中一條叫「黃牛」嘅片入面呼籲政府認真看待黃牛飛呢個問題。

子華喺名為「四張飛」嘅片到講多幾點：

１.正式賣飛會有加場
「或者我哋趁呢個機會講我哋做到應該盡嘅義務係咩呢？我同大家宣佈，我哋4月24號係會正式喺城巿售票網，開始賣飛，真正係有飛嘅賣飛呀吓！啱啱呢一次係預售門票啫，4月24號我哋總共會賣成20幾場嘅飛，OK？原本我係預咗兩場要嚟休息，o依家我唔休息，OK？你當我賺多啲錢又好同大家咩都好，總之博命！有一場預咗要嚟in case打風要嚟賠番俾大家，唔理喇！推晒出嚟，咁所以應該有唔少嘅飛嘅。」

2.唔好買黃牛
「嗱，我上次都好似做咗11場紅館，呢次係多過double嘅數量，所以係希望盡量能夠滿足到觀眾，亦都希望…亦都可能喺現實上都一定有人買唔到飛嘅，一定有人買唔到，希望呢啲朋友能夠體諒，因為…除非開100場㗎啫，因為我都唔知會有幾多人嚟睇，我都唔知有幾多人感興趣，其實大家都係博之嘛。」
「4月24號…我好感激紅館其實已經俾咗好多期，如果大家有搞開騷嘅其實都知道有成廿幾場，其實唔容易得到嘅，好感謝佢哋俾呢個期，我亦都博盡！前兩日見到吳君如，佢話『睇你奀佻鬼命，睇你要做廿場都唔知你頂唔頂得順』唔理喇，OK？即係我會去盡嚟到做，希望盡量多人能夠睇到，而同時唔好買黃牛，Thank you！

3.每人四張飛
「啊我仲漏咗講，呢次買飛呢，我哋定咗每人最多買4張，咁亦都希望杜絕到太多嘅黃牛，亦都希望多啲人能夠睇到啦，如果你係買開十零張俾一家大細嘅，對唔住，呢次引起你少少嘅唔方便，我哋至多每個人只能夠買4張飛。」

精選娛聞，喺晒《娛果》
http://fb.com/appledailyent

黃子華-子華本部facebook連結：
https://bit.ly/2I37eO8