陳凱琳今日喺商台宣傳劇集《平安谷之詭谷傳說》，講到呢套劇口碑不俗，佢開心咁話：「好感恩，有次出街，有個女仔同我講，唔只女人覺得好唔抵，連男人都覺得好嬲。」覺得自己做成點？陳凱琳話：「好啲，感覺舒服，但係自己睇番自己，覺得有好多細位可以再好啲。」

男友鄭嘉穎覺得佢做成點呢？Grace竟然話：「佢冇睇，我叫佢唔好睇。」唔通係因為喺劇中同黃浩然成日咀，所以叫嘉穎唔好睇？佢笑言：「唔關事，因為角色講我哋剛結婚，想帶出甜蜜感覺。」現實中同嘉穎係咪成日錫？佢甜絲絲咁話：「適當時候啦！」再追問點解唔畀嘉穎睇？陳凱琳話：「我好緊張佢俾我嘅評價，如果佢講得唔好我會好上心，所以有少少逃避，未過到嗰關，不過有時一齊睇電視，佢都會讚我做得唔錯，但係把聲要輕少少，身邊有人俾意見都幾好。」

之後又問到有報道指今次Grace嘅演技大躍進，全因男友嘉穎決定幫佢揀劇本，Grace否認此事兼話：「我尊重公司，公司俾我就會拍，不過有啲場口，自己唔識分析，點樣鋪排層次，佢會俾意見我，叫我唔好為喊而喊，有時真係想俾個劇本佢幫我睇好啲，但係佢會叫我自己睇咗先，如果有邊啲場口應付唔到先幫我。」

Grace仲有感而發：「有段時間我對自己演技好灰心，外界對我有好多批評，我覺得拍戲都係想娛樂觀眾，但係如果自己越做越令人嬲，唔鍾意睇我，我都曾經考慮過做戲係唔係我嘅範疇，所以播呢個劇之前，我都好驚，o依家咁多人讚我，我就冇再灰心，亦都未係好有信心，希望未來邁向做多啲唔同角色。」

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent