法官最終判被告入獄四年，盲亨詹昌盛得悉後，不禁問：「咁咪即係坐多幾個月出返嚟？」雖然事隔差不多兩年，他仍不時想起跟女兒的點滴，自問曾經歷大小風雨，這關最難過，「我咩嘢大事都見過，咩嘢都可以捱得過，係個女單嘢我檻唔過」。只怪女兒信錯人。

盲亨說，跟女兒16年以來的相處，這兩年間一直在腦海中浮現。「去親啲地方都諗起佢」。他說女兒五歲時已坐他的車，一點也不怕，「佢知我哋手車安全」。「有時大帽山有車玩，車佢上去睇下啲賽事，見識吓黑夜賽車。」他本人喜歡吃黑椒牛柳，女兒也是，「佢睇住我食，由細到大，啲口味咪跟我囉」。他說女兒喜歡做蛋糕，但他從沒吃過，今後再沒機會試吃了。

記得女兒死前個多月，不時叫他退休，『佢話孭咗佢呢個包袱10幾年喇，俾返個包袱佢自己孭喇』。女兒覺得他「養咗佢10幾年咁辛苦」，是時候退休，「咁當然呢啲說話都令我開心嘅，但我唔會聽囉，你只有15、16歲，起碼過咗20歲先講喇。」估不到等不到這天。

他知女兒拍拖，他一向覺得被告是壞蛋，已提醒女兒「做朋友玩無所謂，唔好咁認真」。「佢想我放低個包袱，由呢個𡃁仔去接力，你憑乜嘢照顧到我女呀？你憑乜嘢養到我個女呀？」他坦言「諗都諗唔到佢會害死我個女，最多都係呃我個女啲錢，冇諗到會害死佢」。

記得當時他狂找了三天，也找不到女兒，突然收到警方噩耗說找到女兒屍體。記者問他當時相信嗎？「信，我搵咗佢3日都搵唔到，差人冇百分百唔會打嚟。」就在前一天，家中的魚缸突然爆了。「一開門成地水，魚缸冇咗一半…啲魚咁細條，冇可能撞爆魚缸。」那是不祥之兆。

記者問他判刑後會否「個心好過啲」，他說：「答唔到你，我都唔知幾時瞓得著，其實會彈起身。」他說女兒的note4電話事後無法尋回，於是他買了一部新的電話，放在女兒房間，「我擺晒佢身前玩嘅嘢，用嘅嘢，嗰間房冇乜點執過，希望佢嘅靈魂返來。佢鍾意hello kitty貼紙，我咪走去買10零張返來擺喺度，擺喺佢床頭。」例如她喜歡吃糖果，他也買了一堆放在房。

甚麼時候將判決告訴女兒？他說清楚記得女兒是2016年12月12日凌晨4時死去，明天他會買報紙，稍後他會預好時間，將報紙拋落海，希望女兒知悉。

記者：楊思雅