港股昨日跌勢持續，恒指33隻成份股中有23隻下跌，但僅跌33點，收16922，主要是兩隻巨無霸滙控（005）及中移動（941）造好支撐大局。其實兩股昨日只係微升0.2-0.3%，令恒指少跌20點而已，由此反映港股昨日沽壓並非太大。期指明日結算，昨日淡友有日股大跌配合都唔大舉出擊，實在令人有些少意外，難道太多人睇淡，大戶又想挾淡倉？
大市雖然跌得唔多，但倉內股票全部報跌，津創（1065）公布業績前有獲利回吐，跌0.06元或3%，收1.86元，幸而成交金額較前幾日升市大幅減少，沽壓並非太大，所以決定以1.76元作止蝕位，睇埋張中期成績表。

太A78元止蝕

太A（019）在8月7日買入後，兩日後最高曾升至84.25元新高，如果肯食糊都有萬餘元利潤，而繼續持有的代價就是要忍受短期波動，太A昨低見80.30元，收80.65元，跌0.9%。技術上正考驗50日線的支持，假如亦失守就要試78元，可作為中線止蝕位。
聯康（690）昨跌0.02元或0.5%，收3.90元，成交疏落。公司昨日公布，建議向9月22日名列股東名冊之股東，10送2公司輪，08年10月3日期滿，行使價5元，較上周五收市價3.92元有溢價27.6%。公司輪每手買賣單位12000份，即係持有6萬股正股或其倍數，就唔會有「碎輪」。今次發輪，或對正股短期目標價有一定啓示。
昨日尾市在3.36元買入10萬股建行（939），早前買入建行炒染藍概念，現時買入炒指數基金如盈富（2800）等落實換馬行動，估計9月8日至11日期間進行，到時隻股上升動力會大增。
趙飛雲