英國近日有個人出書大爆內幕，指荷蘭前鋒雲尼斯達萊當年離開曼聯，原來係因為得罪咗一個人，結果搞到自己無碇企，最終要出走奧脫福。咁雲佬到底係得罪咗邊個？

出書爆料嘅人係前英國首相貝理雅嘅傳訊部門主管甘寶（Alastaor Campbell），聽落好似有啲九唔搭八，但佢嘅另一個身份其實係前曼聯領隊費格遜嘅老死。甘寶爆料指雲尼斯達萊做咗啲嘢，激嬲咗老費，所以無得留低。甘寶係咁寫嘅：「費Sir覺得雲佬太過自我中心，根本無佢乎！」不過真正促成雲佬離開曼聯嘅導火線，其實係另一件事。

「基斯坦奴朗拿度（C朗）嘅爸爸係一個酗酒嘅人，當時佢啱啱過咗身，雲佬竟然走去同佢講，話當時紅魔鬼嘅助教基羅斯就係C朗嘅新老竇。基羅斯之後叫雲佬尊重啲，但雲佬話佢乜嘢人都唔會尊重。雲佬之後有同C朗道歉㗎，不過C朗梗係無咁順攤喇，咁當費Sir知道咗之後，就踢走咗雲佬。」呢位荷蘭前鋒最終喺2006年季尾加盟皇家馬德里，三年之後喺銀河艦隊同C朗重逢，不過雲佬喺下一個球季踢咗一半就離隊咯。