港交所（388）最近公佈，代表小型證券行的C組經紀（排名在66位以後）於今年7月份市佔率升至12.97%，比6月份的12.62%微升0.35%。反而，代表大行的A組經紀市佔率則由6月份51.53%，回落至50.71%。如憑數據去睇，反映近兩個月散戶入市頻率似乎幾活躍。
今年港股表現算係不俗，但不少散戶在大市升浪初期受坊間牛熊爭辯言論影響，搞到升市食唔到第一浸，待大市爆上16000點後才發覺升浪幾堅，先至積極買貨。事實上，銀行存款利息太低，唔少人都想搵方法為資本增值，加上全球各國猛印鈔票，唔少輿論都估計，通脹唔使幾耐就會殺到，有乜投資可以抗通脹？最簡單係股、樓，黃金，三者都有得諗，但就一定唔會係官債咯！

招金礦業（1818）最近公佈上半年業績，營業額同比上升42%至10.6億元（人民幣．下同），純利則升49%至3.16億元。其中值得留意的是，招金毛利率仍維持在54%水平，比同業紫金礦業（2899）的25%優勝，不過論黃金儲備就無得比，招金約有165噸，但紫金則高達704噸。
如果下半年通脹殺到，必與各國濫印鈔票有關，「銀紙」唔值錢，商品價格有望看俏，其中黃金價格年內已徘徊在930美元一盎斯多時，料年底前有機向上突破，有分析認為金價可見1200美元。金價看俏，有利招金，惟現市況氣氛一般，可待招金跌至10元水平吸納，獲利目標15元。
方星俠