【世盃】預測日本小組全勝 邊個女國腳估錯要犧牲色相?
丸山桂里奈日本
男性球迷之間好多時都鍾意攞自己嘅身體做賭注,例如英國球迷就鍾意輸咗紋身、香港球迷就鍾意輸咗「捨棄」自己身體嘅某部份,不過成日都係得把口,唔知呢位日本靚女又係咪得個講字呢?
35歲嘅丸山桂里奈係前日本女子足球隊成員,因為成日都有大膽驚人嘅言論而爆紅。已經退役兼且投身藝能界嘅丸山日前就出席電視台一個世界盃節目擔任嘉賓,喺節目中佢就被問到對日本隊喺今屆世界盃嘅展望,當時日本仲未同哥倫比亞對賽,丸山已經話日本今場贏硬:「日本隊無論個人能力同組織力都非常出色,我覺得好有機會可以小組首名出線。」佢仲話哥倫比亞過往喺星期二進行比賽嘅戰績都麻麻,對日本非常有利㖭。
丸山仲喺節目度預測,藍武士可以喺小組三戰全勝出線,如果預測失敗嘅話就會當眾「露股」,賭咁大?不過日本喺星期二對哥倫比亞嘅首場分組賽又真係順利贏波喎,唔知大家又想佢嘅「三戰全勝宣言」估得中唔中呢?不過節目播出之後,一班日本網民就似乎唔係太想丸山「找數」喇。有網民就話,丸山曾經因為日本國腳身份而獲頒榮譽國民獎,唔應該做出一啲咁低俗嘅行為貶低榮譽國民嘅身份;仲有人話丸山今次「借足球上位」嘅做法好「Cheap」咁話喎。
不過丸山嘅出位言論其實都唔係第一次㗎喇,早喺上年嘅一個八卦節目入面,丸山就爆出自己曾經同一個超級出名嘅男明星交往,仲大爆對方非常「飢渴」,試過「一晚做四次」,雖然丸山冇公開呢位前男友嘅身份,不過日本八卦雜誌就話呢位男明星喺日本著名演員佐佐木藏之介。丸山仲透露過自已曾經同過其運動員同足球經理人交往過,而且所有前男友都有佢嘅裸照喎,所以今次輸賭「露股」對佢嚟講簡直係小兒科啦!
--------------------
一網睇盡
足動世盃 直擊俄國最前線 https://hk.feature.appledaily.com/worldcup2018/
--------------------
《體蘋果》陪你睇波講波
https://www.fb.com/appledailysports
--------------------
迎戰決賽周!《BFB CHAMPIONS 2.0》登入免費送連抽,超級球星立即入隊! http://bit.ly/2xrTKGM