噚日最矚目嘅新聞之一，係now撼低有線寬頻（1097），奪走英超轉播權。唔少英超fans過去係為咗追睇英超球賽而幫襯有線，家吓有線冇咗呢道護身符，小股東先沽為敬。隻股噚日收報1.49元，跌9仙，跌幅5.7%，已經係第二日大跌。有啲散戶想趁低執平貨，亦有散戶對佢已死心。
《香港討論區》入面，網友100millionhkd噚日朝早話：「我睇股價冇下跌空間……非常健康財政，可維持派高息。股價上年跌34%，今年跌22%。冇英超咪算囉，蝕本生意唔做仲好。」
kee07提醒佢：「低處未算低，老友小心。」
haisheng比較樂觀：「與其將大量資金放入英超，不如多元化發展。其實有線有唔少師奶同新聞台fans，我自己就睇Animax，所以唔使太悲觀。」
eddieshop則以負面角度睇呢件事：「冇英超可以冇好多客㗎！我冇friends唔係因為睇波至裝有線嘅！大把stocks揀，點解要博？」
doskey亦好唔畀面：「服務同收費都唔多得，唯一賣點都冇埋，死硬。」
Phil_Chia語出驚人：「呢隻嘢好有當年8號仔feel，一浪低於一浪，買佢隨時等於掟錢落海。」

較高位跌足九成

買大開大就從圖表出發：「個圖好差喎，跌定至買啦。」
近呢兩三日，共有6間大行出報告評論有線，其中5間都係維持負面評級或調低評級至「減持」，只有美林比較畀面，維持「中立」睇法。咁多間大行，麥格理睇得最淡，目標價0.70元，即係現價仲要再跌一半有多，都幾大鑊。
不過，如果睇番張長期走勢圖，大概都唔會對7毫子呢個價太吃驚。隻股自99年11月上市以嚟，股價每況愈下，上市初期最高見過16.70元，之後每隔三兩年就創一次新低。歷史低位係今年8月底嘅1.45元，噚日最低1.47元，岌岌可危，一旦跌穿，恐怕有排跌。𠵱家大市升到咁高，呢隻股就咁弱，如果大市忽然轉勢，隻股唔慌有運行，點計都係博唔過。
余文