林鄭月娥早前喺政綱提出研究喺民政事務局下設立宗教事務小組，專責統籌有關政策後，各界質疑係咪想引入中國大陸嘅國家宗教事務局，天主教香港教區主教湯漢樞機更罕有出信，要求林鄭刪除該項政綱，林鄭承諾一旦當選，唔會跟進。

點知早前現身林鄭分享會嘅「梁粉」聖公會教省秘書長管浩鳴其後接受傳媒訪問時，就批評香港天主教教區「反應那麼大、良心狗肺」，令天主教徒鄭家富亦睇唔過眼，對管浩鳴言論極度震驚及遺憾，不禁發出評論文章「三問」管牧師。

阿富嘅三問包括，管牧師支持設立「宗教事務小組」，係咪項莊舞劍，意在沛公？如何確保「宗教事務小組」，日後唔會變成中國式「宗教事務局」？以及基督教同天主教近年期望合一共融，管牧師嘅言論，係咪有違合一共融，中咗中共嘅分化計？唔知管牧師會唔會回應呢？