玩得《Halo》嘅，一定迷戀佢多人對戰模式，唔少機迷就表明，超期待喺《Halo：Reach》引擎上作基礎重製嘅地圖，跟網友大廝殺！當中最受歡迎嘅經典地圖「Headlong」，將重製成「Breakneck」，唔少機迷聽到，就已經回味緊喺陰濕位狙擊敵人嘅快感。另外官方透露，兩大熱門地圖「BattleCreek」及「Damnation」亦重製成新的「BattleCanyon」及「Penance」，相信仲有更多地圖等機迷落場殺個痛快！
除咗地圖，另一個機迷討論熱點就係Kinect新玩法。雖然香港未有發佈相關消息，但機迷已經議論紛紛，有人話用語音控制實際啲，有人就話配合WAYPOINT功能應該幾有趣。雖然遊戲下周二先出，但齋睇預告片，唔少機迷已讚不絕口，要儲定錢買咁話。

作為重製版遊戲，《Halo：CombatEvolvedAnniversary》都可算非常有誠意。由XBOX到XB360，畫面提升至最高嘅1080p，畫質當然不可同日而語。無論建築物、環境、效果等高清化後，都更加細緻清晰，更具質感。例如樹林大戰中，雜草樹葉更富動態更真實，落雨效果亦做得更逼真，而遊戲亦加入支援3D電視，玩起嚟更投入！新加「ClassicMode」，俾一眾老玩家重溫「那些年」的日子。話得佢有誠意當然唔止聲畫升級咁簡單，重製版更將原作只可以單人挑戰嘅故事模式，進化成可透過XBOXLive同戰友們一齊作戰，更可開啟1,000分成就，趣味大增！遊戲中亦加插咗唔少新內容及任務，俾機迷體驗全新嘅隱藏故事，當中更隱藏《Halo4》嘅故事線索，機迷玩嘅時候真係要落足眼力同腦力。

機種：XB360

開發：343Industries

遊戲人數：1-2人（Live支援2至16人）

推出日期：11月15日　

售價：$209