《壹週刊》選舉最佳僱主，今年由麗嘉酒店攞冠軍，咁啱八方噚日去嗰度間意大利餐廳食飯，亦感覺到啲員工士氣好好，招呼亦比前周到。
原來麗嘉同其他酒店一樣，喺沙士期間入住率跌至百分之八，副總裁李敦白話上下都被迫放十至十四日假，但就冇考慮減薪同裁員。酒店重特別安排免費午餐畀放假員工食，真係唔話得。
至於亞軍新鴻基地產，就喺逆市請咗五百名抗炎大使，副主席郭炳江一樣堅持不減薪，不裁員，公司重煲埋抗炎茶畀員工飲，呢樣得分唔少。富士施樂、天星小輪以及香港寶潔（P&G），就分別攞季軍同優異獎。
其實，最佳僱主使乜選？我哋偉大特首董建華一定win，你入咗佢馬廐，佢必定保你一世，永不用下台，邊度搵咁嘅好老細？


傳真︰2623-9278
電郵︰[email protected]