女神童何凱琳舊年一鳴驚人，以14歲之齡獲中大破格取錄成為特別生，一切順利嘅話，下學年就正式升讀醫學院一年級，踏上從醫之路。呢個世界好多惜才之人，名醫余宇康好賞識凱琳，特別捐出25萬元獎學金，資助凱琳一年特別生及五年醫學院共六年學費，希望凱琳無後顧之憂專心學業，期望佢日後行醫之餘，都考慮向研究方面發展。

上學期成績唔算突出

凱琳噚日接受獎學金後承諾努力讀書，唔會辜負余醫生厚望，由於佢冇讀預科，跳級讀大學幾大挑戰性，遇有唔明白地方，要自修預科書本先識，所以上學期成績唔算好突出，希望下學期可以追上。
全港首位坐輪椅醫學生呂慧翔都獲得獎學金，佢話坐輪椅上堂都幾多問題，上解剖堂時其他同學通通企起身劏屍，佢要借助特別器材輔助先得，不過佢話會堅持落去，呢啲小問題唔會打擊佢讀醫科決心，仲好有信心成為香港第一位坐輪椅嘅醫生㖭。中大醫學院教授沈祖堯話，好欣賞慧翔不屈不撓精神，面對咁大壓力都樂觀應付，希望其他大學生向佢學習，遇上挫折唔好輕言放棄。