當年今日
關於我們

【C1頭條】被老婆反出軌收伏 Eric Kwok唔敢越線

蘋果日報 2018/09/10 01:00

葉佩雯郭偉亮Eric Kwok

跟Eric Kwok(郭偉亮)做訪問,現場卻彌漫着郭太葉佩雯(Grace)的氣息,皆因Eric開口埋口都會提到老婆。而郭太就像一塊植入了他腦內的晶片,隨時可以發揮她的小宇宙。
戲如人生,Eric去年拍了一個音樂劇《短暫的婚姻》,有場戲講述他曾出軌爆喊。事實是他與葉佩雯未婚前,曾經歷感情危機,先是他出軌,後來Grace亦反出軌回敬,雖然事過境遷,但代價還是不小。
他說︰「太太偏向欠缺安全感,呢方面我要俾好大信心佢,其實我已經成日喺屋企做嘢。我studio喺屋企,基本上我廿個鐘都喺度,我係一個好好嘅家庭成員,冇一個老公可以spend咁多時間陪老婆,陪佢傾偈。」
為了令老婆安心,Eric亦刻意與女性保持距離,連社交網的交流也杜絕。他說︰「之前拍戲同女演員合照,我會唔為意,好易就會交換ig、WhatsApp,甚至電話,但太太會提醒我,要小心講嘢,以免俾人大造文章。平時我講嘢唔會刻意避忌,惟獨面對女仔我會小心,唔會咁大膽。我不自覺就會set咗個距離,好似拒人千里咁。」
談出軌,以男性的角度出發,Eric說得理直氣壯︰「我覺得男人唔出軌,一係佢性需要好低,一係就佢道德觀念好重,可以控制自己。男人嘅衝動,咁多十萬年進化,一定想同唔同嘅女人繁殖下一代。你可以控制!如果個老婆永遠都唔知,永遠都發現唔到,呢個世界冇人影到你,咁一百個男人都會做!」他慧黠的眼神一轉,徐徐說︰「咁你實問我會唔會做?我會答你……唔會……我道行好高!哈。呢排啲AV好好睇!呢樣嘢解決到,我諗呢個世界冇AV,應該會好多人出軌!」
Eric近年愛上拍戲,夫妻間亦因此培養了另一種生活情趣︰「以前我睇佢啲戲,好似《創世紀》,只會笑佢,彈佢做得唔好,唔會由演員角度去體諒佢辛苦,但自從我鍾意咗做戲之後,我會問佢點演,又會同佢對戲。以前監製佢啲歌嗰陣,我好嚴,但依家輪到佢笑我,對我指指點點,世界輪流轉囉。我哋識咗18年,好似搵到個新景象,大家有新話題,我從來未拍過樣嘢太太會日日追嚟睇,我哋依家會晚晚一齊睇《全民造星》,多咗好多樂趣。」
在《全民造星》中,Eric是嚴厲的導師,說話不留情面,但他說「嚴」也是為參選者好︰「我係咁就係咁!呢個騷所有嘢都係真實!我係嚴,因為我見到佢哋好嫩,好自以為是,嚴可以令佢哋聽話。尤其男仔唔應該喊咁多!你見到佢第一次喊,你會心軟。但次次都喊,開心又喊唔開心又喊,你就會覺得佢需要俾人鞭策多啲。」
Eric的人生,流淚大部份是生離死別的情景。他說去年9月,與太太葉佩雯養了十四年的愛犬離世,曾一度令他崩潰︰「抱住佢(狗狗)打針走嗰刻,我係咆哮咁喊!我當佢仔咁!」但哭萠完釋放完他自覺舒服很多。
而他們兩夫婦一早共識不生小朋友︰「因為生咗小朋友之後,自己的世界就冇咗!我同太太都係水瓶座,熱愛自由,其實養狗都唔係好自由,但養小朋友係一世,責任太大。」
不想有兒女覊絆,也是為自己保留更多的創作空間。Eric最近簽了老陳奕迅的EAS Music,雄心壯志寫歌,皆因找到了音樂方向︰「呢幾年我做咗其他幕前嘅嘢,好人都以為我忘記咗音樂,之前嗰段休養期,係因為我覺得自己寫嘅嘢好悶,冇新嘅idea,我亦唔想唱出面歌手唱嘅歌,慢歌、情歌真係唔需要我唱,直至14年我做咗《Iron Man》,我就諗我應該做啲輕快、搞笑又有型,有啲幽默嘅嘢。我好清楚自己嘅底線,所以我可以試好多新嘢。」
一個成功男人背後,都有個賢內助,Eric的事業愈來愈好,郭太功不可沒。難怪訪問中,Eric三番四次多謝老婆,懂得感恩、珍惜,就是對愛妻最大的回饋。
撰文︰祖李
攝影︰林德雄、廖達燊
化妝︰ Circle Chong @AnnieGChan
髮型︰Adrian Tong
場地︰FUMI
精選娛聞,喺晒《娛果》
http://fb.com/appledailyent
empty
攝影︰林德雄、廖達燊
empty
戲如人生,Eric與葉佩雯未婚前,曾經歷感情危機
empty
先是他出軌,後來Grace亦反出軌回敬,雖然事過境遷,但代價還是不小
empty
為了令老婆安心,Eric亦刻意與女性保持距離,連社交網的交流也杜絕。
empty
Eric近年愛上拍戲,夫妻間亦因此培養了另一種生活情趣。
empty
在《全民造星》中,Eric是嚴厲的導師,說話不留情面,但他說「嚴」也是為參選者好。