當年今日
關於我們

【大馬搵神醫】被袁文傑抱起跌落地 滕麗名頭拮50針清瘀血

蘋果日報 2017/09/22 14:02

馬來西亞江美儀黃翠如宋熙年針灸滕麗名

林子祥就話有首歌《千支針刺在心》,齋聽都痛,如果見到咁多支針篤喺滕麗名個頭,你又點睇?近日阿滕、江美儀、宋熙年同黃翠如去咗吉隆坡拍攝大馬版《姊妹淘》,佢哋趁空檔又飲又食,向來好注意健康養生嘅阿滕就去咗搵神醫。
阿滕日前喺社交網貼咗針灸頭部穴位嘅相,目測至少有50支針篤喺佢頭頂、眉頭、臉頰同鰓位等唔同位置,阿滕貼圖後留言:「中國醫術,博大精深,佩服,這圖代表我真係冇整過容#針灸#馬來西亞。」相中阿滕眼神帶隱憂,雖然針灸係唔痛,但見咁多支針篤住,都少少令人擔心。
事緣阿滕同袁文傑早前為大台處境劇《愛.回家之開心速遞》開工,有一場戲係袁文傑抱住阿滕,但佢唔小心跌倒,將阿滕拋咗落地,袁文傑結果左邊膝頭碎裂,而阿滕則脊椎受傷,袁文傑事後仲爆話意外發生一刻知好大鑊,因為阿滕郁都唔郁到,袁文傑嚇到個心離咗幾離。
到底阿滕針灸係貪靚美容定醫治隱疾?阿滕今日回覆傳媒時話:「大家唔好擔心,我針灸只係保健,我冇數過篤咗幾多針,大約50支吧。之前拍《愛.回家》一場講袁文傑跌親戲,個頭積住瘀血,我聽講大馬呢個醫師針灸好好,所以嚟到呢邊做嘢,順道睇佢,鼻上啲針係醫鼻敏感。」阿滕話針灸咗約半小時,價錢唔貴。
阿滕針灸完都要補番吓,難得去吉隆坡拍嘢,正所謂辛苦搵嚟志在食,放工當然去「食好西」,有嘆紅酒同食「鹹濕蟹」--鹹蛋黃濕炒蟹同奶油螺。日前仲同江美儀慶祝46歲牛一,壽星女被氹到笑唔停口。 
empty
近日阿滕、江美儀、宋熙年同黃翠如去咗吉隆坡拍攝大馬版《姊妹淘》。《互聯網圖片》
empty
阿滕日前喺社交網貼咗針灸頭部穴位嘅相。《互聯網圖片》
empty
《互聯網圖片》
empty
日前成班朋友仲同江美儀慶祝46歲牛一,壽星女被氹到笑唔停口。《互聯網圖片》
empty
《互聯網圖片》