改編自元岡幼稚園校長呂麗紅嘅真實故事《五個小孩的校長》，睇到唔少市民眼濕濕，綽號「神奇呂俠」嘅呂麗紅對教學嘅熱誠，確實感動全城，噚日仲獲香港教育學院頒授榮譽院士，元岡幼稚園嘅學生同家長都一齊出席典禮，向呂校長道賀，有學生自製賀卡送畀佢，場面好感人。
由7年前只得5個學生，到今日有68個學生（礙於校舍所限，無法再多收學生咯），成為區內「名校」，多得呂麗紅嘅一份堅持。呂麗紅噚日應邀代表全體六位榮譽院士（包括正生書院校長陳兆焯、香港中華煤氣陳永堅、DHL創辦人鍾普洋、官中校長馬紹良、獻身特殊教育嘅謝宗義）致謝辭。

「救校經歷比電影難千倍」

佢話呀，締造卓越優秀教育，究竟有幾難？正如市民畀佢嘅「神奇呂俠」綽號，令人聯想起，辦教育就要變得神奇、多功能、多樣化，更要神化到好似傳說中嘅俠侶，先能成功同卓越，強調教師嘅專業，係以身教、以生命影響生命嘅神聖工作。
佢仲話呀，救校嘅真實經歷，比起電影《五個小孩的校長》內所描述難上千百倍，好希望同年輕人分享，等大家思考佢點解願意成為最低薪嘅校長？點解有人會知其不可而為之？教育嘅真諦又喺邊？
呂麗紅原先喺愉景灣國際學校任教，離任後本可同丈夫環遊世界，2009年，得5個學生嘅元岡幼稚園面臨結束，佢應聘月薪僅4,500元嘅校長職位，用心救校。教院校長張仁良致辭時讚揚今屆榮譽院士中，有人為教育傾注一生之力，有人則喺其他服務崗位為教育作出貢獻。

李八方
mailto:[email protected]